Mecliske Aqmescit merkezinde Qırımtatar bayraq Kününi qayd etmege bermeyler

Qırımtatar Milliy Meclisine Qırımtatar bayraq Kününe bağışlanğan tedbirlerni Aqmescit merkezinde keçirmege ruhset bermediler.

Bunı Meclis kâtibiyetiniñ yolbaşçısı Dilâver Akiyev Facebook saifesinde bildirdi.

Onıñ bildirgenine köre, iyüniñ 11-de Meclis iyün 26-da Aqmescitteki Trenöv bağçasında Qırımtatar bayraq Kününe bağışlanğan tedbirler keçirilecegi aqqında Aqmescit şeer şurasına bildirdi.

Bugün Meclis şeer şurasından menfiy cevap aldı.

Şeer şurası al-azırda K.A.Trenöv bağçasında bala oyun meydançıqları, attraktsionlar çalışa, dersler, yarış ve sergiler keçirile dep, bir yerde çoq adam toplaşması tertip-nizamnı boza bile, dep qayd etti.

Akiyevniñ malümatına köre, Qırımtatar bayraq Kününe bağışlanğan bala yarışları, sergi ve diger tedbirler planlaştırılğan edi.

Aynı vaqıtta, şeer şurası Mecliske Bayraq kününi Gurzufskaya soqağındaki «Salğırka» bağçasında keçirmege tevsiye etti.

Malüm olğanı kibi, Qırım «akimiyeti» Aqmescit merkezinde sürgünlik qurbanlarınıñ hatırasına bağışlanğan matem mitingini keçirmege yasaq etken edi. Merkeziy meydannı OMON sarıp alğan edi, qırımtatarlar ise Aqmescitniñ Aq-Meçet mikrorayonında toplaşqan ediler.

Mecliske Aqmescitniñ merkezinde qırımtatar bayrağı kününi qayd etmege yasaq ettiler