Link açıqlığı

Kreml nezaretindeki Qırım akimiyeti Aqmescitniñ merkezinde matr 16 ve 18 künleri naqliyat areketini qapatmağa niyetli. Bunı Qırımdaki Rusiye akimiyetiniñ matbuat hızmeti bildire.

«Ayırıca, 2017 senesi mart 16 künü saat 08.30 ve saat 10.00 arasında: Kirov caddesinde (Kirov cad. ve Gogol soqağınıñ çatışmasından Kirov cad. ve Nekrasov soqağınıñ yol çatışmasına qadar), Serov soqağında (Aleksandr Nevskiy ve Karla Marksa soqaqlarınen çatışmaları arasında). 2017 senesi mart 18 künü saat 15.30 saat 22.00 qadar: Kirov caddesinde (Kirov cad. ve Gogol soqağınıñ çatışmasından Kirov cad. ve Nekrasov soqağınıñ yol çatışmasına qadar) yol areketi qapatılacaq», – dep haber ete müessise.

Matbuat hızmetinde bildirdiler ki, naqliyat areketiniñ sıñırlanması «referendum» ve «Qırımnıñ Rusiyege qoşulması» yıllığına bağışlanğan tedbirler sebebinden olacaq.

2014 senesi mart 16 künü Qırım ve Aqyarda yarımadanıñ statusı aqqında, dünyada qabul etilmegen, referendum keçirildi, neticede Rusiye Qırımnı özüne qoşqanını ilân etti. Ukraina, Avropa birligi ve AQŞ bu rey berüvini tanımadılar ve Qırım Rusiye tarafında işğal etilgenini tasdiqlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG