SİZOda bulunğan «fevral 26» işi iştirakçisi, dört çağına yetmegen balanıñ babası Ali Asanovnıñ ailesi Rusiye prezidenti Vladimir Putinge murcaat etip, qırımlınıñ azat etilmesinde yardım köstermege rica ete. Şu cümleden, bunı Asanovnıñ qaynanası Zarema Hasanova rica etti.
«Sayğılı Vladimir Vladimiroviç Putin, lütfen, bizge yardım etiñ, balalar qıynala, qızıma ağır, er şey oña qaldı: hocalıq, ev. Balalarımıznı tüşüniñiz. Torunlarım pek qıynala. Ana közyaşlarını añlañız. Kiyevim balalarsız yaşap olamay. Balalar er kün babasını bekleyler. Yaqında qış kele, qızım bir özü dört balanı nasıl baqacaq? Ali qoranta başı da. Lütfen, yardım etiñ», – dey Zarema Hasanova.
Aprelde Aqmescitniñ Kiyev rayon mahkemesi Ali Asanovnı apiske aldı. Bu qararnı Asanov qabaatını tanımay, Ukraina vatandaşı ola ve Ukraina qıtasına qaça bile dep añlata ediler. Bundan da ğayrı, mahkeme Asanovnıñ diger cinayetlerge alâqasını teşkerecek oldı.Asanovnıñ üç çağına yetmegen balası ve saqat babası olğanı aqta deliller nazarğa alınmadı. İyünde Asanovnıñ dörtünci balası doğdı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
