Aqmescit – Qırımtatar halqınıñ al-vaziyeti şimdiki vaqıtta çoq eyi degil. Milliy matbuat ta qıyınlıqlarnen qarşılaştı. Uzun zaman devamında çalışıp kelgen gazetalarından biri – «Avdet»niñ faaliyeti aqqında Qırım.Aqiqatqa neşirniñ baş muarriri Şevket Kaybullayev ikâye etti.
– «Avdet» gazetası 20 yıldan ziyade neşir etile. Bu yıllar içinde neler deñişti?
–1990-ncı seneleri gazeta esasen haberlerni yetkizmek içün çalıştı, bugünki künde daa çoq analitikanen oğraşamız. Bizim vazifemiz oquyıcılarnı tüşünmege teşviq etmektir.
Büyük bir deñişmeler olmasa da, amma qayd etilecek şeyler bar. Gazetanıñ öz şiarı peyda oldı: «Dört bizni qurtaracaq», er qırımtatar qorantsında eñ azı dört bala olmalı, dep belleymiz.
Esas auditoriya - qırımtatarlar olsa da, soñki vaqıtları muarririyetke rus sakinler de keleler, telefon eteler, olar maqaleler içün teşekkurler bildireler ve atta öz materiallarnı ketireler.
Daa bir yöñelişimiz şiiriyetnen bağlı. Pek meraqlı bir saa, onıñ vastasınen öz qasevet ve duyğularnı bildirmek mümkün.
– Keçenlerde gazeta Qırım prokuraturasından «ekstremistik faaliyetnen» bağlı tenbiyelev aldı, siz ise, iformatsion siyasetni deñiştirmeyceksiz, dep ayttıñız. Şimdi nasıl çalışasıñız?
– Biz evelden belgilengen kibi çalışamız. Muarririyetniñ siyaseti deñişmey qaldı. Soñki nusha ve içindeki malümatlar bunı isbatlay. Vaqialarnı kendi noqtai nazarımızdan aydınlatamız. Biz deñişmedik. Belki de müim olmağan şeylerge azca diqqat ayırıp başladıq.
– Gazeta saifelerinde angi mevzularğa daa çoq diqqat ayırasıñız?
– İnsan ve akimiyet arasındaki munasebetlerni aydınlatamız. Akimiyet özüni nasıl alıp bara, cemiyet onı nasıl qabul ete. Hususan qırımtatar oquyfıclarımızğa ait mevzular.
– Gazetañıznı oquğanlar arasında kimler daa çoq: yaşlar ya da üyken nesil vekilleri?
– Biz gazetamıznı er angi yaşta olğanlar içün meraqlı yapmağa tırışamız, ilk evelâ yaşlar içün. Biz bunı bir qaç yolnen areket etemiz. Birinciden, muarririyetimizde esasen yaşlar çalışa. Men yaş hadimlerniñ fikirlerini deñiştirmemege çalışam, amma çoqusı allarda olarnen razı degilim. Olarnıñ maqalelerini yaşlar meraqnen oquylar. Ekinciden, bütün malümatlarnı saytımızda yerleştiremiz, qırımtatar tilinde latin urufatında derc etemiz. Bundan da gayrı, içtimaiy ağlarda, hususan, Facebook-ta faal çalışamız.
– İleride nasıl planlarıñız bar?
– Şimdi planlar aqqında aytmaq küç. Bizim alımız çoq eyi degil, onıñ içün yarın ne olacağını tahmin etmek imkânsız. Yarın kelmey bile. Biz çalışqan kibi çalışmağa devam etmege planlaştıramız. Amma, menimce, kün-künden bunı yapmağa daa ağır olacaq.
