Link açıqlığı

Advokatlar Bağçasaraydaki tintüvlerden soñ qırımlılarnıñ apis ve para cezalarından şikâyet etti


Aprel 13-de Bağçasaraydaki tintüvlerden soñ tutulğanlarnıñ advokatları aprel 19-da Kreml kontrol etken Qırım Yuqarı mahkemesine qırımlılarğa qarşı tizilgen memuriy protokollardan şikâyet arizalarını berdi. Bunı advokatlarnıñ birisi Edem Semedlâyev Facebookta bildirdi.

«Bugün bizler Bağçasaraydaki tintüvlerden soñ açılğan memuriy işlerden yedi şikâyet arizasını berdik. Memuriy işler baqılğan soñ mahkeme qırımtatarlarğa bir memuriy para cöremesini ve 6 memuriy apis cezasını berdi», – dep yazdı Semedlâyev.

Aprel 13-de saba Bağçasarayda Rusiye uquq qoruyıcıları Riza Mujdabayev (6-ncı mikrorayon) ve Seydamet Mustafayevniñ (7-nci mikrorayon) evinde tintüv keçirdiler. Vaqia şaatları uquq qoruyıcılar tarafından küç qullanılğanını ve ateş açılğanını bildireler.

Rusiye uquq qoruyıcıları tintüv ve tutuvlarnı «planlaştırılğan tedbirler» dep adlandırdı.

Ukraina Tışqı işler nazirligi halqara toplulıqqa muracaat etip, Rusiyege qarşı basqını quvetleştirmege rica etecegini bildirdi.

Qırım işğalinden soñ yarımadada mustaqil jurnalistler, qırımtatar faalleri, Meclis azaları ve Hizb ut-Tahrir ile alâqaları olğanında şeklengen musulmanlarnıñ evlerinde tintüvler sıq-sıq keçirilmege başladı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.


XS
SM
MD
LG