Rusiye akimiyetiniñ Qırımda 80-den ziyade matbuat vastası qırımtatar ve ukrain tilinde çalışa kibi beyanatları «sayğısızlıq ve kerçekniñ bozıp kösterilmesidir», dep ayttı Qırımtatar Milliy Meclisiniñ azası, QHA müdiri Gayana Yüksel aprel 10-da Kyivdeki matbuat konferentsiyasıda.
«İşğalciler halqara mahkeme ve halqara meydançıqlarda Qırımda 80-den ziyade kütleviy haber vastası qırımtatarca ve ukraince çalışa, dep bildireler, bunı Rusiye tarafı Gaagadaki Halqara mahkemede de aytqan edi. Bu sayğısızlıq, bu beyanat aqiqattan uzaqtır», – dep ayttı Gayana Yüksel.
Onıñ qayd etkenine köre, Rusiye akimiyetiniñ beyanatları Qırım kütleviy haber vastalarınıñ arizalarına esaslana, anda ise yayınnıñ farqlı tilleri qayd etile, lâkin asılında yayında bu tiller qullanılmay.
«Yañlış bir malümat ola, matbuat vastası tilni bildire, işğalci ise onı yayın tili olaraq tanıta», – dep añlattı Yüksel.
Kyivde aprel 10-da «Qırımtatar matbuat vastaları: işğalge qarşılıq kösterilüviniñ üçünci yılı» mevzulı matbuat konferentsiyası keçirilmekte. Onı qırımtatar jurnalistikası kününe bağışladılar. Teşkilâtçıları İnsan aqları malümat merkezi, Ukraina haber siyaseti nazirligi, Qırımtatar Milliy Meclisi olalar.
