Aprel 6 cumaaqşamı künü Aqmescit şeeriniñ merkeziy bazarında kütleviy surette insanlar tutıla.
Qırım.Aqıqat muhbiri bildire ki, merkeziy bazarnı Rusiyeli OMON sarıp aldı.
Şaatlarnıñ sözlerine köre, silâlı quvetler «slav qıyafetinde olmağan şahıslarnı» tutalar. Yaqalanğanlarnen bir avtobus «E» merkezine yollanıldı, deyler adamlar.
Qırım.Aqıqat muhbiri, bazarğa üç «Gazel» maşnası ketirgenli ve olarğa tutılğan adamlar oturtılğanını bildire.
Qırımlı advokat Emil Kurbedinov, Aqmescitniñ bazarında yaqalanuvlar aqqında haber alğanını Facebookta yazdı.
Bildirüvinde: «Adamlar telefon açıp Aqmeccitniñ merkeziy bazarını silâlı quvetler sarğanını ve insanlar yaqalanğanı aqqında haber bereler», – dep yazılğan.
Qırımlı uquq qoruyıcı organlar Aqmescit bazarında yaqalanuvlar aqqında resmiy izaat bermeyler.
Bu Rusiyeli silâlı quvetlerniñ Aqmescit ve Qırımnıñ diger şeerleriniñ bazarlarında yapqan birinci kütleviy yaqalavı degil. 2016 senesi aprel 6 künü saba Rusiyeli silâlı quvetler Aqmescitniñ bazarlarında kütleviy şekilde vesiqalarnı teşkirgen ediler ve adamlarnı tuta ediler.
Qırımlı advokat Jan Zapruta, silâlı quvetlerniñ areketlerini izaatlar eken, Aqmescitniñ bazarlarında vatandaşlarnıñ kütleviy yaqalanması «Rusiye silâlı müessiselerniñ qullanması içün «malümat bazasını» toldurmaq maqsadınen yaqıldı» dep aytqan edi.
2014 senesi noyabr 15 künü Aqmescitniñ «Lokomotiv» bazarında sıfatı slavân olmağan satıcılar kütleviy şekilde yaqalanğanı aqqında haber etilgen edi.
Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.
