Link açıqlığı

Mart 13 künü Avropa Birliginiñ Şurası, Ukrainanıñ mustaqilligi, suveriniteti ve topraq bütünligi telükede olğanı sebebinden qabul etilgen sıñırlamalarnı daa yarım yılğa uzattı. Olar 2017 senesi sentâbr 15 kününe qadar devam etecekler.

Bu sanktsıyalar çerçivesinde 150 şahıs ve 37 teşkilâtnıñ mülki blok etile ve AB devletlerine kirişi yasaq etile.

Qarar yazılı şekilde qabul olundı ve mart 14 künü, AB resmiy mecmuasında neşir etilgen soñ, amelge keçecek.

AB Şurasınıñ bildirüvinde: «Vaziyetke qıymet kesüv sanktsiyalarınıñ nizamını deñişmek içğn sebep olmadı. Cedvel yañıdan baqıldı ve AB Şurası, vefat etken eki şahısnı bu cedvelden çıqardı. Şimdilik bu yaptırımlar 150 şahıs ve 37 teşkilâtqa ait», – dep haber etile.

Brükselden Radio Svobodanıñ muhbiri haber etkeni kibi, sanktsiyalar cedvelinden vefat etken ayırımcılar Gennadiy Tsipkalov ve Arseniy Pavlov («Motorola») sildiler.

Bu sıñırlama tedbirleri, Ukrainadaki kerginlikke Avropanıñ cevabı olaraq, 2014 senesi mart ayında qabul etilgen ve soñki sefer sefer 2016 senesi sentâbr ayında uzatılğan edi. Olar bir taraftan Rusiye iqtisadiyatınıñ ayrı bölüklerine tesir etip, 2017 senesi 31 iyülge qadar devam etecek. Başqa taraftan, Qırım ve Aqyarnıñ işğali sebebinden qabul etilgen yaptırımlar, 2017 senes iyün 23 kününe qadar devam etecek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG