Link açıqlığı

Mustafa Degermencini mahkemede: taqiqatçı qabaatnı qabul etmege ve Çiygozğa iftira atqanımnı talap ete edi


Aqmescitniñ Kiyev rayon mahkemesi. «Fevral 26 işiniñ» mabusı Mustafa Degermenci, arhiv resim

Kreml nezaretindeki Qırım Yuqarı mahkemesinde «Çiygoz davasınıñ» 87-ci mahkeme toplaşuvında, 2014 senesi fevral 26 künü kütleviy qalabalıqlarda iştirak etkeni ile qabaatlanğan Mustafa Degermenci, ifadelerini berip, taqiqatçı oña basqı yapıp, qabaatını qabul etmege ve Çiygozğa iftira atmağa talap etkenini bildirdi.

Bunı mart 6 künü video-muracaatında advokat Nikolay Polozov bildirdi.

Advokat: «Mustafa dedi ki, taqiqatçı oña basqı yapa edi, qabaatını tanığamağa ve talap ete edi, Ahtem Çiygozğa iftira atmağa talap ete edi, amma o (Mustafa Degermenci – QA) buña razı olmadı. Bir arada onı taqiqat komitetine ketirdiler, anda mufti Emirali Ablayev bulunğan ve, Mustafanı apsten çıqmağa yardımcı olacağına kefalet qarşılığında, onı qabaatını tanımağa çağıra edi. Mustafa teklifni red etti ve Ahtem Çiygoznı aqaretlemege razı olmadı», – tarif etti.

«Mustafanıñ ifadelerinde, o fevral 26 künü (2014 senesi – QA) Qırım MC Yuqarı Şurasınıñ binası ögünde mitingte bulunğanını, Çiygoznı körmegenini ayttı. Onıñ areketleri aqqında bir şey aytıp olamadı. Umumen, insanlarnıñ areketleri tertipsiz edi. O «göñülliler taqımlarını» ve «Russkoye yedinstvo» fırqasınıñ tarafdarlarını körip, şaştı, çünki « Russkoye yedinstvo» tarafından teşkil etilgen miting saat ekige tainlengen edi. Bunnen beraber, o «göñüller» tarafından provokatsiyalar yapılğanını kördi», – dedi Polozov.

Polozovnıñ sözlerine köre, öyleden soñ sorğuğa Ali Asanov çağırıldı.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, şu cümleden «Rus Birligi» firqası, miting iştirakçilerine qarşı çıqqan edi.

Rusiye mahkemesi iyül 20-de qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG