Link açıqlığı

QMC prokuraturası devlet hainligi hususında millet vekili Artemenkoğa qarşı cinaiy iş açtı


Ukraina millet vekili Ardriy Artemenko

Qırım Muhtar Cumhuriyetiniñ prokuraturası, kütleviy haber vastalarında yayınlanğan malümatlar esasında, Ukraina millet vekili Ardriy Artemenkoğa qarşı cinaiy iş açtı. Qırım Muhtar Cumhuriyetiniñ «kirağa» berilecegi aqqında plan azırlağan şahıslar sırasında onıñ da adı keçe. Cinaiy iş açılması aqqında fevral 21 künü Facebookta Ukraina baş prokurorı Yüriy Lutsenko beyan etti.

Ukraina Cinaiy Kodeksiniñ 1-inci qısmındaki 111-inci maddesi (devlet hainligi, yani Ukraina vatandaşı tarafından Ukrainanıñ bütünligi, mustaqilligi, mudafaa qabiliyeti, iqtisatiyat ve ve malümat telükesizligine qarşı mahsus zarar ketirüv areketleri) esasında cinaiy iş açıldı.

Bu madde esasında 10 yıldan 15 yılğa qadar apis cezası tain etilmek mümkün.

Berilgen malümatqa köre, kütleviy haber vastalarında yer alğan beyanatlardansoñ fevral 21 künü cinaiy iş açıldı.

Vesiqada yazıla ki, Ukraina halq vekili «2017 senesi yanvar ayında Ukrainadan tış olğanda, bundan evel Rusiye ükümet reberlerinen añlaşıp, devletke hainlik yaptı, çet memleketke (Rusiyege) Ukrainağa qarşı areketlerinde yardım etmeknen, Ukraina Esas Qanunına ve qanunlarına binaen devletniñ ayırılmaz parçası olğan Qırım Muhtar Cumhuriyetini uzun müddetke kirağa bermek çağıruvlarına ketirdi, bu ise yarımadanıñ işğalini resmiyleştirmege adım olmaq mümkün».

New York Times gazetinde derc etilgen maqalede yazıla ki, Milliy telükesizlik suallerinde AQŞ prezinetniniñ mesleatçısı Michael Flynn, istifağa ketmezden bir afta ögüne, Donald Trumpqa yaqın olğan şahıslardan Ukrainadaki umumiy vaziyetiniñ tüzetilmesi çerçivesinde Rusiyege qarşı kirsetilgen sanktsiyalarını toqtatmaq tekliflerini aldı.

Neşirde qayd etkenlerine köre, Trumpnıñ advokatı Michael Cohen, SSBC-de doğğan AQŞ prezidentniñ iş ortağı, Rusiyede biznes saasında oña yardım etken Felix Sater ve Ukraina millet vekili Andriy Artemenko bu tekliflerniñ azırlanmasında iştirak ettiler. Neşirniñ malümatına köre, muabbetlik planı – Ğarbiy Ukrainadan bütün Rus ordularınıñ çıqarılması ve Qırımnıñ Rusiyege 50 ya da 100 yılğa kirağa berilecegi aqqında Ukrainada referendumnıñ ötkerilmesi kire edi.

Ukraina Yuqarı Radasında «Radikal fırqanıñ» yolbaşçısı Oleg Lâşko firqa azası Andriy Artemenkodan, Qırımğa dair fikirleri sebebinden, Ukraina halq vekiliniñ mandatını qaldırmağa talap etti.

Ukraina Yuqarı Radasınıñ reisi Andriy Parubiy fevral 21 künü deputat Andriy Artemenko, Oleg Lâşkonıñ «Radikal fırqası»fraktsiyasından çıqarılğanı aqqında ilân etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG