Link açıqlığı

Cemilevniñ ağasını FSBde «Hizb ut-Tahrir davasınıñ» taqiqatı çerçivesinde sorğuğa çeke bileler – Ümerov


İlmi Ümerov

Qırımtatar Milliy Meclisiniñ reis muavini İlmi Ümerovnıñ fikirince, Asan Cemilevniñ (Mustafa Cemilevniñ 80 yaşındaki ağası – QA) sorğuğa çağırılması «Hizb ut-Tahrir davasında» qabaatlanğan «Bağçasaray dörtlüsiniñ» işinde şaatlarnı tapma ıntıluvıdır. Bunı Ümerov fevral 16-da Qırım.Aqiqatqa bildirdi.

Ümerovnıñ aytqanına köre, Asan Cemilevge berilgen sualler 2013 ve 2015 seneleri Bağçasarayda musulman bayramları azırlıqlarınen bağlı oldı.

«Sorğu vaqtında er keske tedbirlerde çıqqan küçük qavğalarnıñ videoları taqdim etildi. Zıddiyetler merasimlerniñ ötkerme şekillerinen bağlı farqlı fikirlerge esaslandı – tedbir teşkilâtçıları ve yerli sakinler añlaşıp olamay ediler: musafirlerniñ yerleşmesi, erkek ve qadınlarnıñ ayrı oturması, tedbir künü», – dep bildirdi Ümerov Facebook saifesinde.

İlmi Ümerov Qırım.Aqiqat mühbiriniñ Mustafa Cemilevniñ ağası qırımtatarlarnıñ liderine basqı yapmaq içün sorğuğa çekile bilemi sualine menfiy cevap berdi.

İlmi Ümerov Asan Cemilevniñ sağlığını aytıp, Rusiye uquq qoruyıcıları sorğuğa çekilgen insannıñ yaşı ve sağlığına baqmay, dep qayd etti.

«Mence, Mustafa Cemilevnen iç bir alâqası yoq. Sağlıq alına olar baqmay. Asan Cemilev eskiden din cemiyetiniñ reisi edi. O, Bağçasarayda faal edi», – dep añlattı o.

Fevral 16-da Bağçasarayda beş yerli sakin sorğuğa çekildi: Musa Tatarov, Mustafa Mustafayev, Asan Cemilev, Ebazer Abibullayev ve İsmail Ablayev.

Ukraina Tışqı işler nazirligi işğal etilgen Qırımda Ukraina vatandaşlarınıñ taqip etilmesinden qasevet etkenini bildirip, basqılarnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG