Qırım musulmanları diniy idaresiniñ müftisi Emirali Ablayev Rusiye uquq qoruyıcılarınıñ tarafını tuttı, dep ayttı Qırım.Aqiqatqa qırımtatar faali Enver Şerfiyev.
«Elimizde olğan malümatqa köre, Qırım musulmanları diniy idaresiniñ vekilleri Qırım musulmanlarınıñ tintüvleri ve apiske alınmalarına yardım ete. Olar Qırım musulmanlarını terrorizm ve ekstremizm ile qabaatlaylar. 2014 senesi mart ayında Emirali Ablayev qırımtatarlardan iç birini ıncıtmağa bermez, dep aytqan edi», – dep qayd etti Şerfiyev.
Cemaat faaliniñ zanınca, Qırımda QMDİ yardımı ile farqlı fikirde olğanlar ile büyük küreş kampaniyası başladı.
«2017 senesi yanvar 26-da Bağçasarayda FSB uquq qoruyıcıları faal Seyran Saliyevniñ evinde tintüv keçirip, onı apiske alğanlar. Aynı şu künü FSB hadimleri advokat Emil Kürbedinovnı yaqaladı. Advokatlarnıñ Aqmescitteki ofis ive Emil Kürbedinovnıñ evinde tintüv keçirildi. Mence, Qırım akimiyeti Qırım musulmanlarınıñ faal qısmını qorquzacaq ola. Uquq qoruyıcılar advokatlarğa sert basqı yapa. Farqlı fikirlernen faal sürette küreşeler», – dep izaatladı vaziyetni Enver Şerfiyev.
2016 senesi noyabr 19-da 14 qırımtatar din cemiyeti Kyivde toplaşıp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.
2014 senesi Rusiyeniñ Qırım işğalinden soñ QAMDİ yapqan areketlerini Meclis ile muzakere etmey. Yanvar 16-17 künleri Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı.
