Qırımtatar Milliy Meclisiniñ reis muavini İlmi Ümerovnı Rusiye maliye monitoringi federal hızmetiniñ saytında terrorist ve ekstremistler cedveline kirsetildi. Onıñ sanı – 5826, dep bildirdi qızı Ayşe Ümerova.
«İlmi Ümerov Rusiyeniñ terrorist ve ekstremistler cedveline kirsetildi – №5826. Sözde memuriy cinayet (sentâbr 22 körüşüvi) içün bergen para cezasınıñ tünevin ödemege imkân olmağanınıñ sebebidir. Öz mahkemesiniñ qararını beklemek bile yoq», – dep yazdı Ayşe Ümerova.
Haber etildi ki, dekabr 29-da İlmi Ümerov Qırım mahkemesiniñ Qırımtatar Milliy Meclisiniñ toplaşuvında iştirak etkeninden oña bergen para cezasını ödep olamadı.
«2016 mayısta «ekstremizm» maddesi boyunca maña qarşı uydurılğan bir cinaiy iş açıldı, taqiqat devam ete, vesiqalar mahkemege daa berilmedi – qabaatım isbatlanmağanını aytam... Aydı, bu da ne?», – dep yazdı İlmi Ümerov Facebookta.
Mayıs 12-de Qırımnıñ sabıq prokurorı Natalya Poklonskaya FSB taqiqatçıları İlmi Ümerovğa qarşı ekstremizm maddesi boyunca cinaiy iş açqanını bildirgen edi.
Qırımtatar milliy areketiniñ meşur iştirakçisi, Meclis reisiniñ muavini İlmi Ümerovnıñ yaqalanması, evinde keçirilgen tintüv ve oña qarşı cinaiy iş açılması, mecburiy mahkeme-psihik ekspertizanıñ keçirilmesi içün psihiatrik hastahanede tutılması cemaat arasında ve halqara seviyede büyük rezonans doğurğan.
