Avropa Birliginiñ mahkemesi Lüksemburgta, Rusiyeli iş adamı, prezident Vladimir Putinge yaqın olğan Arkadiy Rotenbergke qarşı Qırım işğalinden soñra kirsetilgen sanktsiyalarnı qısmen destekledi. Bunı Radio Svoboda Haber ete.
Mahkeme, Rotenbergke qarşı 2014 senesi 30 iyülde qabul etilgen sanktsilarnı esassız olaraq tanıdı. Bunen beraber mahkeme 15 mart 2015 senesi kirsetilgen yaptırımlarnen razı oldı. Bu sanktsiyalarnıñ sebebi daa doğru añlatılğanınen bağlı. Metinde, Rotenberniñ «Stroygazmontaj» şirketi Qırımğa köpür qurmaq içün devletten sımarış alğanı qayd etile. Bundan evel Avropa Birliginde, Rusiyeşi milliarder yarımadanıñ işqalinen bağlı olğanına sadece ima ete ediler.
Mahkeme şikâyetinde Rotenberg, sanktsiyalar onıñ şahsiy mülk aqqını bozğanını ayta edi. O, yaptırımlar aqqında alınğan qararlarnı lâğu etmege, ve ziyanlarnı qaytarmağa talap ete edi. Lâkin AB mahkemesiniñ qararında Rotenbergke berilecek tazminatlar aqqında söz yürsetilmey.
Rusiyeli biznesmen 2014 senesi iyül ayında, onıñ şirketi Keriç keçitinden qurulacaq köpürniñ leyasını azılap başlağan soñ, sanktsiyalarğa oğratıldı. İş adamına AB devletlerine kiriş yasaq etildi, onıñ Avropa banklarında saqlanılğan paraları ise tevqif etildi. Soñra aynı yaptırımlar AQŞ tarafından qabul etildi.
Rotenbergten ğayrı, «Rosneft», VEB, VTB, «Sberbank», «Gazprom neft» ve TV alıpbarıcısı Dmitriy Kisilöv te Avropanıñ sanktsiyalarına şikâyet ettiler.
