Berdânsk taqımınıñ sıñırcıları «Çonğar» kiriş-çıqış nezaret noqtasında memuriy sıñırnı bozuv ile ve talap etilgen vesiqasız keçecek olğan 15 Özbekistan vatandaşını tuttı. Bunı UNN agentligi Berdânsk sıñırcı taqımınıñ matbuat hızmetine esaslanıp bildire.
Berilgen malümatqa köre, noyabr 23-de «Çonğar» nezaret noqtasına 15 Özbekistan vatandaşı cayav keldi.
«Pasport vesiqalarınıñ sıñırcı kontroli kerçekleştirilgende arbiyler çetel vatandaşları işğal etilgen Qırımğa qapalı kiriş noqtasından keçkenini ögrendi, memuriy sıñırnı keçmek içün mahsus izinleri yoq», – dep aytıla haberde.
Özbekistan vatandaşları esas Ukrainağa alınmayıp, memleketke kirişleri 3 yılğa qadar yasaq etildi.
