Birleşken Milletler Teşkilâtı Baş assambleyasınıñ üçünci komiteti toplaşuvında noyabr 15, salı künü Ukraina teşebbüsi ile azırlanılğan «Qırım Muhtar Cumhuriyeti ve Aqyar şeerinde (Ukraina) insan aqlarınıñ vaziyeti» rezolütsiyası qabul etildi.
Rezolütsiyağa 73 devlet qol tuttı, 23 – qarşı çıqtı, 76 – bitaraf qaldı. Qırım.Aqiqatnıñ malümatına köre, vesiqada işğal etilgen Qırımda toplu şekilde insan aqlarınıñ bozulmasına qarşı tenqid bildirile ve işğalci-devlet Rusiye halqara uquqqa köre öz mecburiyetlerini eda etmege çağırıla.
Bunen beraber rezolütsiya Rusiyede qanunsız yaqalanğan Ukraina vatandaşlarınıñ yiberilmesi ve Qırımtatar Milly Meclis areketiniñ yasağı lâğu etilmesi kerek olğanını qayd ete.
Vesiqa Rusiyeni halqara uquq qorçalayıcı mehanizmlerine, ilk evelâ Birleşken Milletler Teşkilâtınıñ Ukrainada insan aqlarına riayet etilmesini nezaret etken missiyasını Qırımğa alıp, insan aqları vaziyetiniñ monitoringini keçirmek imkânını bermege çağıra. Vesiqada BMT insan aqları Yuqarı komissarınıñ İdaresine Qırım yarımadasındaki vaziyet aqqında ayrı bir esabat azırlamaq muracaatı mevcut.
Rezolütsiya leyhasınıñ müellifleri BMT azası olğan 41 devlet ola.
