Ukraina prezidenti Petro Poroşenko Qırımda insan aqlarınıñ bozulması boyunca mahsus rezolütsiyanı Ukrainanen beraber azırlağan İsveçyağa minnetdarlığını bildirdi. Bunı Ukraina prezidentiniñ resmiy internet-temsilciligi haber ete.
«BM çerçivesinde yapılğan semereli işbirlik içün men isveçyeli ortaqlarımızğa ve İsveçya baş nazirine teşekkürlerimi bildirmege isteyim. Yarın BM Baş assambleyasınıñ Üçünci komitet toplaşuvında Qırımda insan aqlarınıñ qorçalanması boyunca rezolütsiya baqılacaq. Bu rezolütsiyanı Ukrainanen beraber azırlağan İsveçiyağa teşekkürlerimi bildirem», – dedi Petro Poroşenko noyabr 14 künü İsveçya baş naziri Stefan Löfven ile birlikte keçirgen matbuat konferentsiyası devamında.
«Ümüt etemiz ki, yarın nevbetteki sefer dünya tolulığınıñ Qırımda insan aqlarınıñ bozulmasına ve Rusiye tarafından Qırımnıñ işğal etilmesine qarşı reaktsiyası kösterilecek», – dep qayd etti Ukraina prezidenti.
İsveçya baş naziri Stefan Löfven qayd etti ki, AB ottaqlarınen birlikte İsveçiya Qırımnıñ ve Aqyarnıñ qanunsız işğal etilmesine ve Rusiyeniñ Ukrainağa yapqan tecavuzlarına nisbetten qattı qarşılıq kösterecegini belgiledi.
«Biz işğal etilgen Qırımda insan aqlarınıñ bozuluvlarınen de raatsızlanamız», – dedi o.
Ukraina prezidenti Petro Poroşenko noyabr 14 künü iş ziyareti ile İsveçiyada buluna.
