Eki kün devamında (noyabr 4-5 künleri) Dünya Qırımtatar kongressi (BDQK) İcra komitetiniñ azaları ve cemaat faalleri Qırım, Ukraina ve dünyadaki qırımtatarlarnıñ al-vaziyetini muzakere ettiler. BDQK İcra komiteti altıncı oturışnıñ netice qararını aydınlattı, dep bildire QHA.
Böylece, BDQK yanında Gençlik komitetini qurmağa, halqara teşkilâtlarğa «yaqalanğan, öldürilgen ve qaçırılğan vatandaşlar» aqqında muracaat bermege qarar alındı.
«2017 senesi fevral 1-den 2017 senesi mayıs 24-ne qadar BDQK Koordinatsion şurasınıñ azası Ervin İbragimovnıñ ğayıp olğan kününe bağışlanğan simvolik bir aktsiyanı başlatmaq», – dep aytıla qararda.
Bütün devletlerge, şu cümleden cezalarğa qoşulmağan memleketlerge, muracaatlar tizilecek ve yollanacaqtır.
Dünya qırımtatar kongressi – Vatanları Qırımda, em de dünyanıñ farqlı köşelerinde – Türkiye, Romaniya, Poloniya, Amerika Qoşma Ştatları, Kanada, Litvaniya, Ğarbiy Avropa ve Orta Asiya memleketlerinde yaşağan qırımtatarlarnı birleştirgen bir qurulıştır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
