Ukraina tarafından Rusiye vatandaşları içün vizalı rejim kirsetilse, büyük ihtimal ile ukrainliler içün de vizalar kirsetilecek. Böyle taqdirde ukrainliler Qırım ile memuriy sıñırnı daa ağır keçe bilecekler. Böyle fikirni Qırım uquq qorçalayıcı gruppası seslendire.
«Rusiye Qırımnı öz toprağı olaraq qabul ete. Demek ki, Qırımda qalğan soy-soplarnı ziyaret etmek içün Ukraina vatandaşları Rusiye konsolluğında viza almaq kerek olacaqlar. Bunen beraber viza alınacaq vaqıtta ziyaretniñ maqsadı ve barılacaq yer bildirilmek kerek olacaq», – deyler uquq qorçalayıcılar.
Olar qayd eteler ki, Ukraina vatandaşları barılacaq yer olaraq ya Qırımnı belgilemek kerek olacaqlar, ve böylece sanki Qırımnıñ işğalini qanuniy olaraq tanıycaqlar, ya da Rusiyeniñ diger şeerini aytıp, Rusiyege sıñır noqtalarından keçecekler ve soñra Keriç keçitinden Qırımğa kelmek zorunda qalacaqlar.
Lâkin böyle etip, vatandaşlar Ukrainanıñ «Vaqıtınca işğal etilgen topraqtaki uquqiy rejim, vatandaşlarnıñ aq ve serbesbestliginiñ yerine ketirilmesi aqqında» qanunnı bozğan olacaqlar, deyler uquq qorçalayıcılar.
Keçenleri Ukraina Yuqarı Rada Yolbaşçısı Andriy Parubiy deputatlarğa Rusiye ile vizalı rejimnı kirsetmek meselesini baqmağa teklif etken edi.
