Link açıqlığı

Kremlge boysunğan Qırım Yuqarı mahkemesi sentâbr 13-te Qırımtatar Milliy Meclisi azası İlmi Umerovğa qarşı cinaiy iş açılması, faş etmeme ve psihiatrik hastahanege qanunsız qoyulmasına qarşı onıñ imayecisiniñ şikayet arizalarını red etti.

Bu aqta Umerovnıñ rusiyeli adliyecisi Nikolay Polozov Twitterde bildirdi.

Adliyeciniñ sözlerine binaen, dava çerçivesinde Umerov bildirdi ki, FSB taqiqatçısı qabaatlanğannı evelden kardiologiyadan çıqarmağa talap etken edi.

Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.

Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.

Sentâbr 7-de İlmi Umerov klinikadan çıqtı. İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.

Ukraina Tışqı işler nazirliginde bildirdiler ki, endi nevbette – İlmi Umerovdan qanunsız qabaatlavnı çıqarmasıdır.

«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG