Rusiye tarafından işğal etilgen yarımadada belgisiz ğayıp olğan Qırım sakinleri aqqında fotosergi tünevin Ukraina Tışqı işler nazirliginde açıldı. Qırımtatarlarnıñ lideri Mustafa Cemilevniñ bildirgenine köre, ğayıp olğanlarnıñ fotoresimleri ecnebiy devletlerniñ Qırımda insan aqları bozulmasına diqqatını celp etmege yardım eter.
«Teşkilatçılarnıñ sözlerine köre, fotosergi vazifelerinden biri, ecnebiy devletler elçileriniñ insan aqları bozulmasına, qorquzmalarğa ve insanlarnıñ ğayıp olmasına diqqatını celp etmektir, bunıñ içün fotoserginiñ ara-sıra faqrlı diplomatik müessiselerde keçirilmesi planlaştırıla», – dep bildire Cemilevniñ matbuat hızmeti.
Fotosergi «Rusiye tarafından Qırım işğali devamında belgisiz ğayıp olğanlar ve elâk olğanlar» adını taşıy. Merasim Qırım Muhtar Cumhuriyetinde rusiyeli işğalci nizamından zarar körgen Ukraina vatandaşlarına bağışlanğan, dep bildirdi teşkilatçılar. Sergi Qırımtatar Resurs merkezi, Qırımtatar Milliy Meclisi, Ukraina Tışqı işler nazirligi tarafından, Demokratiya içün Avropa Fundunıñ desteginen teşkil etildi.
Ukraina haber siyaseti naziriniñ birinci muavini Emine Cepparnıñ keçken afta bildirgenine köre, Rusiye tarafından işğal etilgen Qırımda 24 siyasiy mabus, 16 belgisiz ğayıp olğan kişi ve 10 elâk olğan insan oldı.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
