Rusiyeniñ çeşit regionlarında yaşağan qırımtatarlar federal milliy-medeniy muhtariyetni teşkil etmege niyetleneler, dep ilan etti Rusiyege boysunğan Qırım ükümetiniñ Milletlerara munasebetler ve sürgün etilgen vatandaşlar meseleleri boyunca Devlet komitetiniñ reisi Zaur Smirnov.
Bu aqta o, «RİA Novosti» agentligine bildirdi.
Smirnovnıñ qayd etkenine köre, Qırımda qırımtatar milliy-medeniy muhtariyeti endi çalışıp başladı, onıñ yolbaşçısı Eyvaz Umerov oldı. Endi, onıñ sözlerine köre, Rusiye regionlarında qırımtatarlarnıñ regional muhtariyetleriniñ teşkil etilmesi boyunca iş alıp barıla.
«Şimdiki vaqıtta qırımtatarlarnıñ milliy-medeniy regional muhtariyetleri teşkil etilmesi boyunca iş Sankt-Peterburg, Astrahan vilâyeti ve Moskvada alıp barıla. Bundan soñ qırımtatarlar federal seviyesinde milliy-medeniy muhtariyetni qurmağa aqqını alacaq», – dedi Smirnov.
Onıñ sözlerine köre, muhtariyet yolbaşçısı Milletlerara meseleler boyunca Rusiye prezidenti yanındaki Şurada taqdim etilecek. Smirnovnıñ malümatına binaen, qırımtatarlar Krasnodar ülkesi, Moskva ve Moskva vilâyeti, Tataristan, Dağıstan, Çeçenistanda yaşay.
Qırımtatar Milliy Meclisi temsilcileriniñ böyle beyanat boyunca izaatları daa yoq.
Mayıs başında bir sıra qırımtatar faalleri Rusiye prezidenti Vladimir Putinge, baş nazir Dmitriy Medvedevge ve Rusiye Federatsiyasınıñ diger yüksek dereceli resmiy şahıslarına açıq muracaatnen sözde bulundı. Muracaatta faaller işğal etilgen Qırım territoriyasında «qırımtatar milliy-medeniy muhtariyetiniñ» teşkil etilmesine qarşılıq bildire.
2015 senesi iyül ayında Ukraina prezidenti Petro Poroşenko Ukraina Esas qanunına Qırımda qırımtatarlarnıñ milliy muhtariyeti aqqında maddelerni kirsetmege kerek olğanı aqqında ilân etti. O, aynı vaqıtta, halq deputatlarını devlet Anayasasına mütenasip deñişmelerniñ kirsetilmesine qol tutmağa çağırdı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
