Link açıqlığı

Saatnıñ esas haberi

BLOGLAR

Cuma 2 avgust 2019

Calendar
Kefe, iyül 31, 2019 yılı

Tünevin tışarıda bir qadın meni toqtatıp: "Sizde mında supermarket qayda? Alma almağa isteyim", dep soradı. Men oña meyvanen tükânçıqnı kösterdim - qıyıştı. Qomşu tükânnı - daa pek qıyıştı. Aqşam edi, bazar endi qapaldı, bunıñ içün bazar tarafına men kösterip de oturmadım. Qadın ise: "Maña "Pâtöroçka" kerek! Ya da "Aşan", ya da "Avoska", dep qıçırıp yiberdi. "Siz mında Qırımda ne yapıp qoydıñız, olacaq bir supermarket de yoq!" Soñ ağlap da başladı, amma bu, bellesem, sıcaqtan.

Mında ise supermarketler yoq. Şimdi "PUD" degen bir şey bar, amma yahşısı anda bir şey almamaq. Andaki mal bizim degil, ketirilgen, eñ yahşı ihtimalde - Krasnodardan. Bazarğa, er kes - bazarğa. Anda da hucur mal çoq, men bunıñ aqqında yazğan edim, amma sağlam sebze ve meyvalar ep bir çoqluqta.

Yerli sakin olmaq güzel: satıcılar seni bile, bu qaşqavalnı almañız, bu balıqnıñ endi qoqusı bar, dep, kerçekni aytırlar. Turistlerge ise olar böyle demez, qazanmaq kerek de. Mına kurortqa kelgenler ketirilgen erzaqnı em aşay.

Amma kurortçı - o, çoqusı alda, yalıda. Plâj resimlerini bir kere daa köstereyim, buña oşay.

Kefe, 2019 yılı, iyül 31
Kefe, 2019 yılı, iyül 31

Plâjlarnıñ toluca ve boşça yerleri de bar, amma çoqusı böyle sıfatta. Kefeniñ yalı kenarı da raatlanıyıcılarnen tolu degil.

Kefe, 2019 yılı, iyül 31
Kefe, 2019 yılı, iyül 31

Temiz, sabadan sipireler, çeçek suvaralar - pek dülber. Turistni bekleyler, oña avlanalar. Mına, dersin, avgust ayı, şeer raatlanıyıcılarnen tolu olmaq kerek. Amma yoq, meskenni kirağa bermege tırışmağa devam eteler.

Kefe, 2019 yılı, iyül 31
Kefe, 2019 yılı, iyül 31

Ve ebet, ekskursiya satmaq içün de turistlerge bir av bar. Kefe merkezinde bu yıl bu tur noqtalarnıñ ne qadar peyda olğanını tasavur etip olamazsıñız bile. Türlü noqtalar, türlü tur operatorlarından.

Kefeden "Taygan" arslanlar parkına kezinti 850-700 ruble. Parknıñ özünde de kiriş 1000 ruble. Anda barıp keldim - güzel, ebet, amma sıcaq! Ayvanlarda sıcaqtan horlana, zornen nefes alalar.

Kefe, 2019 yılı, iyül 31
Kefe, 2019 yılı, iyül 31

Amma romantika ve güzellikke uzanğan turistler de bar. Mına Grinniñ müzeyine nevbet. Ne güzel!

Kefe, 2019 yılı, iyül 31
Kefe, 2019 yılı, iyül 31

Ve, niayet, sadece plâjda küneşlenmek mümkün. Amma mında mıqayt olmaq kerek - bar da sizni Afrika qıraliçesi kibi saylarlar/ Men bunıkördim. Qıraliçe ayrette qaldı!

Kefe, 2019 yılı, iyül 31
Kefe, 2019 yılı, iyül 31

Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)

«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Rusiye Yuqarı mahkemesi ögünde Bağçasaraydaki birinci «Hizb ut-Tahrir davası» boyunca mahküm etilgen qırımtatarlarğa qoltutuv aktsiyası. Moskva, 2019 senesi iyülniñ 11-i

«Qırım birdemligi» birleşmesi Moskvada narazılıq aktsiyasına çıqıp para cezasını alğan qırımtatar faalleriniñ cöremelerini ödemek içün ekinci marafonnı başlattı. Mahkeme olarnı 360 biñ ruble miqdarında para cezalarına üküm etti. Yañı marafonnıñ simvolik adı bar – «Birlik para cezalarından daa qıymetlidir».

Mahkeme, faallerge 3 million 600 biñ ruble miqdarında cöreme bermesi mümkün edi – bir şey deñişmez edi. İnsanlar halqnıñ aqları oğrunda küreşkenler içün kerek olğan paranı toplar edi. Qırımtatar halqınıñ birligi ayat qaidesi oldı. «Menim işim yoq» – muabbet qırımtatar halqı aqqında degil.

Qırımtatar halqınıñ birligi ayat qaidesi oldı

2017 senesi yüzlernen qırımlı musulman «terrorizm» ve «ekstremizm» qabaatlavlarına razı olmağanını bildirmek içün bir kişilik narazılıq aktsiyalarına çıqıp para cezasını alğan soñ «Qırım birdemligi» cemaat birleşmesi «Qırım marafonı» çerçivesinde para toplamağa başlağan edi. İnsanlar cöremelerni ödemek içün kerek olğan paranı (daa ziyadesini) topladı. Söz sırası, paranı tek qırımtatarlar degil, diger milletler de berdi. Qırımtatarlarğa küreşleri ve barışıq tirenüvi içün minnetdar olğan ukrainalılar esas Ukrainadan çoq para yolladı.

Eminim, «Birlik para cezalarından daa qıymetlidir» yañı marafonı birincisi kibi muvafaqiyetli olacaq. Er bir insan belli sebeplerden bir kişilik narazılıq aktsiyasına çıqamaz ya da belli aktsiyada iştirak etemez, amma bir çoq kişi faallerge birdemligini kösterip, olarnıñ küreşine maddiy ceetten qoltutmağa azır. Halq birligi budır, iç bir repressiya onı yeñip olamaz. Atta aksine: bu repressiyalar halqnı daa ziyade birleştire.

Qırımtatarlarnıñ Moskvada keçirgen narazılıq aktsiyasınıñ büyük rezonansı ve semereli neticesi oldı. Bir çoq tanışımdan eşitkenim kibi, Rusiye saylavlarında yerli şuralarnıñ deputat namzetleri olaraq iştirak etmege aman-aman qandırılğan qırımtatar cemaatçıları bu «meraqlandırğan tekliflerden» vazgeçti. Moskva aktsiyası imperiyalar ebediy ve atta uzun ömürli olmağanını, halq hatırası ise qaviy olğanını hatırlattı. Qırımnıñ şeer ve rayonlarında qırımtatarlar Rusiye deputatlarına namzet köstermekten vazgeçmege başladı. Rusiyege qoltutqan «Qırım» areketinen beraber «Yedinaya Rossiya» firqası 15% qırımtatar deputat namzetini köstermege planlaştırğan edi – olar içün bu buyun bir darbe!

Halq birligi em cöremelerden, em deputat mandatlarından, em diger şahsiy kârlardan daa qıymetlidir

«Ne içün deputat olmaq kereksiñ, halqına yardım etmek içünmi?» – dep soray özünden cemaatçı ve faaller. İstegiñ olsa, yahşı bir işni deputat mandatı olmağanda da yapmaq mümkün. Meselâ, Qarasuvbazarda yerli cemaat faali esli-başlı Eldar Şabanov parası ve mandatı olmasa da, qırımtatarlar toplu yaşağan Sarı-Su qasabası yanında ışıq qoydırıp oldı. Ebet, memurlarnıñ odalarından çıqmay edi, amma maqsadına irişti! Qasabanıñ bütün sakinleri oña pek minnetdar.

Halqnıñ meseleleri tek deputat olsañ, çezile bile kibi lafları manaçıq ola. İlk evelâ şunı hatırlamaq kerek ki, Rusiye akimiyeti halqnıñ 2014 senesi «referendumnı» tanımayıp köstergen birligini ve neticelerini bozmaq içün qırımtatarlarnı deputat yapacaq ola. Amma asırlar devamında qırımtatar halqınıñ genetik seviyede şekillengen birligi Rusiye akimiyetine «böl ve üküm et» taktikasını tolusınen kerçekleştirmege bermey.

Şu sebepten halq birligi em cöremelerden, em deputat mandatlarından, em diger şahsiy kârlardan daa qıymetlidir.

Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Daa yüklemek

XS
SM
MD
LG