Link açıqlığı

Saatnıñ esas haberi

BLOGLAR

Kefe yalısı

Qırımda yaşağanım qadar, daima eşitem ki: mevsim müddetini keñleştirmek kerek. Raatlanıcılar sadece iyülden avgustqa qadar olmasın da, deyik, mayıstan oktâbrgece olsun. Qayd etmek kerek ki, Türkiye kurortlarında bunı yapıp olalar. Bizde - yaramayca

Er yıl eşitemiz ki, Qırımda turistler ep artmaqta: 5 million, 6 million, bu yıl endi 7 million bekleyler! Nasıl sayğanları - bu ayrı bir sual. Mına, deyik, Krasnodardan fura keldi, onıñ eki aydavcısı bar. Mayıs ayı devamında o yarımadağa 7 kere kirdi - mına 14 raatlanıcı oldı!

Kezlev mevsimge azırlanğanını er vaqıt begene edim. Anda ağaçayaqlı teatr, İvan Kupala bayramı, ve er yıl yañı bir şeyler - suqlanasın! Kefede öyle degil: kurort ve turizm bölügi yavaş ve avesliksiz çalışa.

FVN-niñ malümatına köre, Qırım çalışma razılığını dörtten tek bir plâj aldı. Qalğanları - yoq. Yazğace bir qaç kün qaldı, plâjlar ise azır degil. Kefeniñ baş yalısından kezinip baqıñız, qullelerde qurtarıcılar barmı? Qulleler bar, amma qurtarıcı bir vaqıt olmay. Adamlar yalıda em de yuvuna, em de küneşlene, qurtarıcılar ise yoq. Bütün keçken yazda olğanı kibi yoqlar - olar ya da katamaranlarnı kirağa berip tura, ya da raatlanıcılarğa massaj yapa. Bu, elbette ki, pek müim ve faydalı, amma qurtarıcı qulleler aysa nege qoyuldı?

Gemi batqan yeri yanında yuvunma yasağı yazısı barmı? Yoq. Yagmur kanalizatsiyası aqıp turğan yerde (merkeziy plâj) yuvunma yasağı barmı? Bar edi, amma şimdi yoq.

Bir qaç unutılmağan kün hastahanede keçirmege istemeseñ, plajlarda yuvunmaq kerekmey olğanını yerliler bile. Kurortçılar ise bilmey. Daa yaramayı, olar kimerde balalarnen kele. Balağa ise, deñiz suvunda oynap yuvunğanda ağıznı qapatıp tutmaq ve saqın suv yutmamaq kerekligini añlatmaq qıyın.

Nesi yahşı - ceçek çoq. Yalı boyu o qadar çeçek men daa körmegen edim - şeer memuriyeti çoq ğayret kösterdi.

Amma çöplük da çoq: yazıq, amma yerliler onı olur-olmaz yerlerde taşlay. Ve onı kelgenler attı, dep aytmaq kerekmey, çünki olar daa, mına saña, yoq.

A mına binalarnı fasadlarınen ise güzel olmadı. Yalı kenarındaki binalarnıñ fasadlarınen yañlış kamuflâj yolunen kettiler: binalarnı basma parçalarınen qapattılar. Ve icadiy yanaştılar: balkonda bir qaç yıl evel yıqılğan sutunlarnı resimlediler. Körünişi endi dülber ve bay. Bu balkonı soñ ne yapacaqlar, aqılım kesmey. Oña da basma çekerlermi? Amma o öyle sepile ki, bir basma dayanmaz...

Ve plâjnıñ qorası: men er şey añlayım, o 30 yıl evel yapılğan, çoqça olmasa. Amma o totlı - boyalamağa kimseniñ vaqtı olmadı. Amma, kerçekten aytsam, onı bozıp, yañı tayanğıç qoymaq kerektir.

Короче, продолжаем готовиться к подступающему сезону. Ждем курортника!

Qısqası, mevsimge azırlıqnı devam etemiz. Kurortcını bekleymiz!

Armen Haçaturov, Kefeden bloger (adı ve soyadı deñiştirilgen)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkü

Ğayıp olğan qırımlılarğa qoltutuv aktsiyası. Kyiv, 2016 senesi avgust ayı

2015 senesi küzde endi Qırımda degil edim, İsmail Gasprinskiy müzeyiniñ birinci müdiri vefat etken edi, onıñ aqqında programma azırlayıcaq oldım ve İlmi Umerovdan yardım istedim. Ervin İbragimovnıñ koordinatlarını berip, o, mıtlaqa yardım eter, dep ayttı. Ervin mennen pek tez bağlandı, buña şaştım (ayat vadelerge inanmamağa ve insanlardan yardım beklememege ögretti). Öyle de tanış oldıq.

Ervin kerekli malümatlarnı, insanlarnı pek tez taptı – er şeyni doğru ve vaqtında yaptı. O qısqa iş yazışuvımıznı baqsam, yüregim ağıra…

2016 senesi aprelniñ 16-nda Vilnüste keçirilgen Dünya qırımtatar kongressi icra komitetiniñ toplaşuv iştirakçilerinen Borıspil ava limanına qondıq. Ervinni qarşılağan maşinada başta menim içün de yer tapıldı. Faqat kelgende yer yetmegeni añlaşıldı. Avtobusqa baracaq oldım, amma Ervin bunı red etip, yerini maña berdi, özü ise avtobusqa ketti.

Ervin İbragimov
Ervin İbragimov

Bu küçük ikâyede Ervinniñ özü bar – alçaq göñülli, yımşaq, yuvaş – kerçek er adamı, namus ve alicenaplıq onıñ içün tabiiy bir şey edi – böyle terbiye körgen edi.

Soñki körüşüvimizde aqlımda böyle insan olıp qalğan edi – uzaqqa ketken, amma yoq, ebediylikke ketkenine inanmağa istemeyim…

Biz sene alâ daa bekleymiz, Ervin…

Malümat: Bağçasarayda 2016 senesi mayısnıñ 24-nde aqşam şeer şurasınıñ deputatı, Dünya Qırımtatar Kongressi icra komitetiniñ azası Ervin İbragimov hırsızlanğan edi. Onıñ maşinası yol ortasında tapıldı. Ğayıp olğan kişi mayısnıñ 25-nde Meclis azalarınen beraber Sudaqqa baracaq edi, anda qırımtatar faalleriniñ mahkemesi planlaştırılğan edi.

Daa soñra Ervin İbragimovnı Bağçasarayda tutuv videosını kütleviy haber vastaları derc etti.​

Ğayıp olğan insannıñ babası yarımadanıñ Rusiye prokuraturasına ariza berip, oğlunı qıdırmağa rica etti.

Qırım Muhtar Cumhuriyetiniñ prokuraturası Ervin İbragimovnıñ ğayıp olmasınen bağlı mahkemeden evel tahqiqat keçirmekte.

Qırım aq qorçalayıcı gruppası İbragimovnı Rusiye akimiyeti ya da onıñ kontrolindeki gruppalar hırsızladı, dep tahmin ete.

Kyivde Ervin İbragimovnıñ ğayıp olğanını hatırlatmaq içün er ay «Ervin qayda?» aq qorçalayıcı aktsiyaları keçirilmekte.

Ervin İbragimov Rusiye akimiyetine qarşı faal sürette tirengen, Ukraina topraq bütünligine açıq-açıq qoltutqan edi. Bugünge qadar ğayıp olğan kişi aqqında bir de bir malümat yoq.

Muarririyetten: bu maqale ilk sefer 2017 senesi mayısnıñ 24-nde derc etilgen edi

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Gülnara Bekirova, Qırım tarihçısı, Ukrain PEN-klubınıñ azası

Daa yüklemek

XS
SM
MD
LG