Link açıqlığı

Saatnıñ esas haberi

BLOGLAR

Ahtem Çiygoz

BM Havfsızlıq şurasında martnıñ 15-nde Rusiyeniñ Qırım işğaliniñ beşinci yılına bağışlanğan mahsus toplaşuvı keçirildi. Toplaşuvda Qırımtatar Milliy Meclisiniñ reis muavini Ahtem Çiygoz çıqışta bulundı. Qırım.Aqiqat çıqışınıñ tolu metnini derc ete.

Hanımlar ve efendiler, bizni davet etkeniñiz içün pek memnünmiz! Bu tedbir bizim içün Qırımdaki yüz biñlernen Ukraina vatandaşınıñ oğrağan faciağa diqqatıñıznı celp etecek bir fırsat.

Beş yıl evelsi Rusiye Qırımğa, vatanıma, ordusını haince, aydutça kirsetip, onı işğal etti. On biñlernen insan, Keriçten Aqmescitke qadar, Aqmescitten Aqyarğa qadar – qadın, bala, qartlar – bu arbiy maşina, «yeşil adamçıqlar», Qırımnıñ yollarında dolaşqan terroristlerge qarşı narazılıq şiarlarınen çıqtı. Miting iştirakçileri üç tilde ayttı – qırımtatarca, rusça, ukraince: «Putin, def ol! Kerekmeysiñ, bizni qorçalamağa kerekmey!».

Rusiyeniñ bu yoldan ketkeni Qırımda serbest ve barışıq içinde yaşamağa istegen vatandaşlarımızdan intiqam oldı. Ukrainanen beraber olmağa istegenleri içün intiqam. Bütün medeniy memleketlernen beraber olmağa, kelecegi içün küreşmege ve serbest yaşamağa istegen Ukrainadan intiqam alalar.

Beş yıl evelsi Rusiye Qırımğa, vatanıma, ordusını haince, aydutça kirsetip, onı işğal etti

Rusça aytam ve Rusiye vekilleriniñ külümsiregenini körem. Ve hatırlatmağa ve eminliknen aytmağa isteyim, bugünde-bugün Ukraina ve Qırımda yapqan cinayetleriñiz içün cevap bereceksiñiz. Yüz biñlernen ananıñ közyaşını sizge iç bir vaqıt afu etmeycekmiz. Balalarımıznıñ yetim qalğanını ve bugünde-bugün vatanımda barışıqsever sakinlerge qarşı yapqan terror intiqamını iç bir vaqıt afu etmeycekmiz. Sizni iç bir vaqıt afu etmeycekmiz. Ne qadar vaqıt keçse keçsin, cevap bereceksiñiz.

İnsanlarnı nasıl boysundırmağa tırışqanıñıznıñ şaatı olam. Yüzlernen insan apishanelerde qala ve sizge qarşı çıqa, çünki olarnıñ şeref ve itibarları bar, siziñ ise yoq.

Sizni iç bir vaqıt afu etmeycekmiz. Ne qadar vaqıt keçse keçsin, cevap bereceksiñiz

Hanımlar ve efendiler! Bugün, mında oturğanda bile, Qırımdaki facia devam ete. Qırımdaki Ukraina vatandaşlarımızdan iç birisi raat yaşamay ve yarınki künni tüşünemey. Qırımnı onı güzelleştirmek içün zapt etmediler, insan aqlarına riayet etmek içün de zapt etmediler. Bugünki künde Qırım – qorqu yeridir. Qırım – bütün Qara deñiz havzasında, Avropa Birliginde vaziyetni kerginleştirüv yeridir.

Qırım – bütün Qara deñiz havzasında, Avropa Birliginde vaziyetni kerginleştirüv yeridir

Biz ümüt etemiz. Bizler – Qırımda bulunğan yüz biñlernen Ukraina vatandaşımız, XXI asırnıñ cinayetçisi Putinge (Rusiye prezidenti Vladimir Putin QA) onıñ barışıqsever insanlarğa qarşı yapqan zulumını unuttırmañız, barışıqsever vatandaşlarnı qorçalamaq içün – halqara toplulıqnıñ yeterli qadar imkânı bar – bütün usullarnı qullanırsıñız, dep ümüt etemiz.

Barışıq küreşimizde em Ukraina şarqında, em Qırımda canlarımıznı feda etip, bu facia tezden biter, dep ümüt etemiz. Tezden serbest olıp, sizlernen beraber medeniy dünyanı quracağımızğa ümüt etemiz.

Malümat: Martnıñ 15-nde BM Havfsızlıq şurasında «Timsaliy san: Rusiyeniñ Qırım işğaliniñ başlanğıç yıllığı: halqara uquqnıñ bozuluvı» mahsus toplaşuvı keçirildi.

Halqara toplulıq Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey.

Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

İşğalge qarşı qadın-qızlar aktsiyası Aqmescitte, 2014 senesi, mart 8

Beş yıl evel Rusiye Qırım yarımadasını işğal etti. O vaqialarnı biz “Qırım: işğal kündeligi” mahsus leyhamızda tasvirleymi

2014 senesi zemaneviy qırım tarihinde ilk sefer ve şimdigece sonki sefer martnıñ 8-i künü öz manasını ifade etti - Qadın-qızlar aqları oğrunda küreş.

Kün ketişatı

Martnıñ 8-ine gece rusiye quvetçileri “Şçölkino” ukrain sıñır hızmetiniñ bölügini, silâhanesini ve, sıñırcılarnıñ qorantalarını azbarğa quvıp, evlerini zapt etti.

“Şçölkino” ukrain sıñır hızmetiniñ bölüginiñ zapt etüvi, 2014 senisi, mart 8

Saba Aqmescitte “Qırım samooboronası”ndan 3 avtobusnen kelgen 100 silâlı adam cumhuriyet arbiy komitetini elge alıp, anda öz ştabını teşkil etti.

Rusiyede, Sankt-Peterburg şeerinde Mars tarlasında silâğa qarşı - Ukrainada rus ordularınıñ olmasına qarşı - miting keçti.

Антивоенный митинг в Петербурге, 8 марта 2014 года
Антивоенный митинг в Петербурге, 8 марта 2014 года

Aqmescitke uçıp kelgen halq mebusı Oleğ Lâskonı “Qırım samooboronası” ava limanında tuttı.

Aqmescitte Merkeziy medeniyet parkında “vatanperver” cıyıştıruv keçti.

Bir qaç yüz faalci park yolaqlarını sarı-mavı renkte olğan sipirtkilernen sipirdi, sarı ve mavı çantalarğa çöplük cıydı. Qadınlar sarı-mavı şeritlerni saçlarına ördi, aqaylar Ukraina bayraqlarınen oldı.

Rusiye kinocılarından 50-den çoqu Rusiye interventsiyasına qarşı mektüpni imzaladı.

Rusiye askerleri Çonğar qasabasını ve Herson vilâyetine ait olğan Arabat beliniñ simaliy tarafını elge aldı.

Aqmescitte “Qırım samooboronası”zapt etilgen arbiy komitetke kelgen Kyiv faalcilerine atıp başladı. Keççe Moskova tarafdarı olğan adamlar on ukrain jurnalistke ücüm etti.

Aqmescit arbiy komitetinin yanında atuvlar, 2014 senesi, mart 8

Aqmescit merkezinde bir qaç yüz adam "referendum" ve rusiye qanunsız kirişine qarşı mitingge çıqtı.

"Referendum"ğa qarşı miting Aqmescitte, 2014 senesi, mart 8

Bütün Qırım boyunca (Çonğar, Novooleksiyivka, Canköy, Qurman, Kezlev, Aqmeçit, Bağçasaray, Keriç, Kefe, Eski Qırım, Qarasuvbazar, Zuya, Aluşta, Aqmescit)12 biñden çoq qız-qadın cenkke ve rusiye işğaline qarşı aktsiyalarğa çıqtı.

Qadınlar ukrain ve qırımtatar bayraqlarınen Qırım yolları boyunda canlı sıranı tizdi.

“Biz barışıq içün” qadın aktsiyası, 2014 senesi, mart 8

50 adamdan teşkil olğan “Qırım samooboronası”nıñ birinci “rota”sı Gagarin parkında “Qırım halqına sadıqlığı”nda yemin etti.

Poloniya Aqyardaki konsullığınıñ işini toqtattı ve hızmetçilerini Odessağa tahliye etti.

OBSE közetüv komissiyasını üçünci kere Qırımğa yibermediler. Anda olğanlar avağa tenbiyelici atışlar olğanını ayta edi.

Qırımda OBSE missiyasına atuvlar, 2014 senesi, mart 8

Aqmescitke Qarasuvbazar tarafından rusiye askerlerinen 70-ge qadar arbiy maşna kirdi.

Rusiye arbiy masnalarını kolonnası Aqmescitte, 2014 senesi, mart 8

Ermeni Bazarda “Diamond” Ukraina sıñı devriye uçağına attılar. Uçucılar zararlanmadı.

Ukrain sıñırcılarnıñ uçaqına atuvlar, 2014 senesi, mart 8

Prezident vazifelerini becergen Oleksandr Turçinov, Qırımda Ukraina havfsızlıq hızmetiniñ Baş idaresiniñ başı rütbesine Oleg Absalâmovnı tayin etti.

Blok etilgen ukrain arbiy qısımlar yürek şeklinde tizilip, qadınlarnı bayramnen hayırladı.

Ukrain arbily adamları Qırım qadın-qızlarını mart 8-inen hayırlay

Daa yüklemek

XS
SM
MD
LG