Link açıqlığı

Saatnıñ esas haberi

BLOGLAR

Körgezmeli süret

2018 senesiniñ kiriş kampaniyası devamında onlarce qırımlılar ukrain kollecleriniñ studenti oldı. Olar daa alışıp da yetiştirmediler, 2019 senesi kiriş kampaniyası başlandı.

Oktâbrniñ başında Ukraina Tasil ve İlim nazirligi, 2019 yılda kiçik mütehassıs tasil-kvalifikatsiya derecesiniñ aluvı içün oquvğa qabul etüv şartlarını (ileride - Şartlar) (2018 senesi oktâbr 10-undan №1082 TİN emri) tasdıqladı

“Kiçik mütehassıs tasil-kvalifikatsiya derecesiniñ aluvı içün oquvğa qabul etüv” - III bölükniñ 5-inci maddesinde qayd etile:

“Vaqtınca işğal etilgen topraqlarda yaşağan ya da andan 2019 senesi yanvar 1-inden soñ köçken şahıslarnıñ oquv yurtlarına qabul etilmesi №560 emrinen tesbit etile”.

Yani Şartlar, qıta Ukrainanıñ kolleclerine ilhaq etilgen Qırımdan balalar sadeleştirilgen sistema boyunca kire bilecegini tayinley. Bunıñ içün olar 3 imtiannı tapşırmalı: ukrain tili, Ukraina tarihi ve profil imtianı.

Bundan ğayrı, Şartlarda, qırımlılarnıñ imkânlarını közde tutıp, esas müddetler belgilengen:

  • Vesiqalar 2019 senesi iyül 1-den 13-üne qabul etile.
  • Kiriş imtianları 2019 senesi iyül 14-ten 21-gece tapşırıla.
  • Oquşqa qabul etüv 2019 senesi iyül 23-üniñ saat 12:00 qadar yapıla.

Qırımlılarnıñ kirmek aqqı olğan oquv yurtları, Ukrainanıñ vaqtınca işğal etilgen topraqlarda yaşağan şahıslarnıñ, aliy ve üner-tehnika tasilini alması icün vesiqa qabul etüv qaidelerinen (24.05.2016 senesinden №5690 TİN emri) belgilengen, bu imkân aliy oquv yurtlarınıñ terkibinde olğan kolleclerge de ükümsüre.

“Qırım Ukraina” tasil merkezleri çalışqan aliy oquv yurtlarını baqsaq, kelecek yılda qırımlılar kire bilecek kollec cedvelini tizmek mümkün

2019 senesi kkiriş kampaniyasınıñ soñ qaidelerini, Ukrainanıñ vaqtınca işğal etilgen topraqlarda yaşağan şahıslarnıñ, aliy ve üner-tehnika tasilini alması icün vesiqa qabul etüv qaidelerinen (24.05.2016 senesinden №5690 TİN emri) baarde peyda olacaq deñişmeleri belgilecek.

Ukraina sizni bekley!

Oleg Ohredko, “Almenda” şirketiniñ ekspert ve analitigi

«Bloglar» rubrikasında bildirilgen fikir-tüşünceler müelliflerniñ baqışlarını aydınlatıp, muarririyetniñ fikirlerinen aynı olmaması mümkün

Keriç politehnik kollecindeki kütleviy öldürüv vaqtında elâk olğanlarnıñ memorialı. Keriç, 2018 senesi oktâbrniñ 18-i

Aman-aman episi genç olğan yigirmiden ziyade insannıñ ayatını alğan facia kimseni raat qaldırmaydır. Men ve zenaatdaşlarım elâk olğanlarnıñ qorantalarına taziyeler bildirip, sabır etip dayanmağa tileymiz. Bu kütleviy öldürüvden soñ belli bir hulâsalar çıqarıla bile.

Aman-aman beş yıl devamında men ve zenaatdaşlarım, advokat ve aq qorçalayıcılar, terrorizmde qabaatlanğan vatandaşlarnen çalışamız. Taqım-taqım tahqiqatçılarnıñ işini köremiz. Bir gruppada on altı insan ola! «Gizli» şaatlar tapılğanını, telefon ve aşhane subetleri diñlengenini köremiz. Devlet parasına çoq tomlı ekspertizalar sımarlanğanını köremiz ve ilâhre.

Facia Qırımda terrorizmge qarşı telükesizlikni temin eteceklerniñ muvafaqiyetsizligini kösterdi
Emil Kürbedinov

Amma tünevinki facia Qırımda terrorizmge qarşı telükesizlikni temin eteceklerniñ tam bir muvafaqiyetsizligini kösterdi. Anda Qırım yolbaşçısı degil, Qırımda terrorizmge qarşı tedbirlerni temin etken diger hızmetniñ reberi olmaq kerek edi. Keriçteki facia yerinde insanlarnıñ közüne baqmaq kerek edi.

Qırımtatarlar, musulmanlarnıñ evlerinde tintüvler keçirilgende ve insanlar tutulğanda bütün hızmet ve mahsus bölükler qoşula: gvardiya, göñülli, adiy urbalı insanlar, silâlı birleşmeler, uçucısız apparatlar qullanıla. Faaller işbirligine razı olsun dep, mahsus hızmetler tarafından azaplarğa oğratıla ve qorquzıla.

Bütün müessise ve teşkilâtlarnıñ reberleri bar. Odadan çıqmayıp, içtimaiy ağlar, internette «kelişmegen paylaşuv» ya da «yañlış tefsirni» tez-tez körgenler bar.

Bu reber ve adiy urbalı insanlar qayda edi? Agent ve moderatorlar qayda edi?
Emil Kürbedinov

Bunıñ episi büyük imkânlar bar olğanını köstere, amma olar bam-başqa tarafqa yönelgen. Bir genç silâ içün komponentler aldı, onı toplap işletti, silâ ve patronlar satın aldı. Genç, şaatlarnıñ aytqanına köre, uzun bir müddet devamında özüni bu şekilde köstergen edi. Suallerim peyda ola: bu reber ve adiy urbalı insanlar qayda edi? Agent ve moderatorlar qayda edi?

Bir qırımtatarı ya da ukrain faaliniñ terrorist olaraq resmiy tanılması mümkün edi kibi fikir meni qorquta. Böyle bir şey seslendirilse edi, devlet kanallarında milletlerara ve dinlerara duşmanlıq doğurılması devam eter edi.

Yaqınlarınıñ acısına lâqayt qalmağan ve semetdeşlerine yardım etken ekim, satıcı, restoran idarecisi ve çoq balalı babalar «terrorist» dep ilân etildi
Emil Kürbedinov

Bugün böyle facialardan qorçalanğanımıznıñ iç bir kefili yoq. Yaqınlarınıñ acısına lâqayt qalmağan ve semetdeşlerine yardım etken ekim, satıcı, restoran idarecisi ve çoq balalı babalar «terrorist» dep ilân etildi. Olarnıñ evlerinde tek edebiyat ve dijital tehnika tapılğan edi. Olarnıñ silâsı ve bombaları yoq. Olar birini öldürmege ve akimiyetni zapt etmege planlaştırmağan edi.

Ne içün olar yıllarnen apishanede yata? Ne içün patlatmağa, öldürmege azırlanğan ve bunı kerçekleştirgen biri azatlıqta edi? Bu menim ve zenaatdaşlarımnıñ esas sualleridir. Böyle vaziyetlerde imayeni temin eteceklerniñ tam bir muvafaqiyetsizligidir. Olar öz küçüni bam-başqa tarafqa doğrultqanlar.

Emil Kürbedinov, qırımlı advokat

«Bloglar» rubrikasında bildirilgen fikir-tüşünceler müelliflerniñ baqışlarını aydınlatıp, muarririyetniñ fikirlerinen aynı olmaması mümkün

Daa yüklemek

XS
SM
MD
LG