Yañı Zelandiyadaki terror. Onlarnen insan camide atıp öldürildi (video)

Yañı Zelandiyanıñ Kraystçerç şeerindeki camilerge yapılğan ücümler neticesinde 40-tan ziyade insan elâk oldı, dep bildirdi memleketniñ baş naziri Casinda Ardern. Daa 20-den ziyade kişi ağır yaralandı. Ardern uquq qoruyıcılar ücümni «yahşı planlaştırılğan» terror aktı olaraq tanıy, dep bildirdi. Politsiya eñ az dört insan yaqalanğanını haber etti. Memlekette yüksek telüke seviyesi ilân etildi. Avstraliya baş naziri Skott Morrison Yañı Zelandiyanıñ Kraystçerç şeerindeki eki camige yapılğan ücüm davası boyunca yaqalanğanlardan biri Avstraliya vatandaşı ola, dep bildirdi. Atış mesüliyetini öz boynuna alğan insan 28 yaşında avstraliyalı olğanını ayttı. O, ücümni planlaştırmaq ve azırlamaq içün Yañı Zelandiyağa kelgen eken. Ücüm etken kişi insanlarğa ateş açqanda bunı içtimaiy ağlarda canlı yayında köstere edi. Politsiya içtimaiy ağlarnıñ qullanıcılarını bu videonı saifelerde paylaşmamağa çağıra, Yañı Zelandiya sakinlerine ise camige barmaqtan vazgeçmege tevsiye etile.