Halq tamğalanğanlarnıñ tarafını tuta – Mumine Saliyeva «Hizb ut-Tahrir işi» figurantlarına qol tutuv aqqında (video)

Rusiyeniñ kontroli altında bulunğan Aqmescitteki Kyiv rayonı mahkemesi Bağçasaraydaki «Hizb ut-Tahrir işi»niñ üç figurantına apis muddetini üç ayğa uzattı. Seyran Saliyev, Memet Belâlov ve Timur İbragimov muvaqqat izolâtorda eñ az martnıñ 9-na qadar qalacaqlar. Qabaatlanğanlarğa qol tutmaq içün yüzge yaqın faaliyetçi keldi. Mahkeme oturışuvınıñ başında advokatlar, muhakeme etilgenlerniñ şeref ve ırızlarını aşalağanı içün, cam «akvarium»ından çıqarılmalarını rica ettiler. Mahkeme, qorçalayıcı tarafnıñ ricasını red etip, zaldan diñleyicilerniñ bir qısmını çıqarttı. Çıqarılğanlar eñ soñu akemniñ areketlerine qarşı şikâyetler yazdılar. Advokatlar, sıñırlav tedbirleriniñ ev apisine deñiştirilmesini talap ettiler. Faqat mahkeme talapnı red etip, işniñ figurantlarını muvaqqat izolâtorda qaldırdı. Advokatlar yaqın vaqıtta bu qararğa qarşı şikâyet etmek niyetindeler. «Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete. Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.