«Bu eziyetlevdir» – Qırım advokatı «Bağçasaraydaki Hizb ut-Tahrir işi» aqqında (video)

Aqmescitteki Kyiv rayonı mahkemesi dekabrniñ 5-nde «Bağçasaraydaki Hizb ut-Tahrir işi»niñ üç figurantına apis müddetini üç ayğa uzattı. Ernes Ametov, Marlen Asanov ve Server Zekiryayev muvaqqat izolâtorda martnıñ 9-na qadar qalacaqlar. Episi çoq balalı babalar. Server Zekiryayevniñ 12 balası bar. Advokatlar Aleksey Ladin ve Emil Kurbedinov imayeleri altında bulunğanlar içün ev apisi talap etti, lâkin mahkeme olarnıñ delillerine emiyet bermedi. Advokatlar buña, itiraf etmekni red etken qabaatlanğanlarğa tazyıqtır, dep qıymet keseler. «Bağçasaraydaki Hizb ut-Tahrir işi»niñ figurantlarına qol tutmaq içün yüzge yaqın faaliyetçi keldi.