«Maskalı qara insanlar alıp ketti» – Arsen Abhairov qorantasınıñ hatırlavları (video)

Arsen Abhairovnıñ qorantası evlerinde tintüv keçirilgen künni hatırlay. Arsenniñ ömür arqadaşı Azize üç yaşında qızları Medine devamlı babası aqqında aytıp, fotoresimlerini öpe, bir yaşında oğlançıqları ise baba sevgisi ne olğanını tam olaraq añlap olamadı, dep ayta. 2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyev rayon mahkemesi olarnı tevqif etti. Кusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti. Aq qorçalayıcılar «Hizb ut-Tahrir davası» boyunca apiske alınğan ve mahküm etilgen qırımlılarnı siyasiy mabüs dep saya, olarnıñ taqip etilüvini ise diniy sebeplernen bağlay.