Link açıqlığı

Saatnıñ esas haberi

Baba evi. Qırımtatarlarnıñ nesiller bağı


Zair Akadırov incir yanında
Zair Akadırov incir yanında

Qartbabam Refat Asanov (anamnıñ babası) – doğma Simeizlidir. Biz pek az körüştik. Aman-aman subetleşmedik, em de men pek ufaq edim. Qartbabam Qırımğa 80-lerniñ başında qayttı. Er bir qırımtatarı kibi ömür boyu mında qaytmağa tırıştı. Teessüf ki, tuvğan toprağında pek az yaşadı. Vefat etkende men doquz yaşında edim.

Tuvğanlarımnıñ aytqanlarını diñlep, Simeizde qartbabam qorantasınen beraber 1944 senesi sürgünlikke qadar yaşağan ev turğanını ögrendim. Vatanğa qaytqan soñ anda bir qaç kere barğan eken. Kene yahşı, şimdiki saipleri – Rostov vilâyetinden köçkenler – kirmesine mania olmadılar.

Simeizde olğanda er vaqıt bu evniñ yanına barmaq istey edim. Amma, ne yazıq, onıñ turğan yerini bilmey edim, qıdırmağa da fırsatım olmadı.

Keçken küzde bu ğayemni kerçekleştirip oldım. Merhametli insanlarnıñ yardımı ile bizler evni tapmaqnen beraber onıñ içine de kirdik. Şimdiki saipleri (sağ olsunlar) qarşı çıqmadı.

Bir vaqıtları tuvğanlarıñ saçqan terekniñ meyvasından aşamaq, ayıp etmeñiz, amma ayrı bir duyğudır

Ev içinde keçmişni añdırğan çoq şey yoq edi. Çoq şey deñiştirildi, yañı inşaatlar quruldı. Eski mimarcılıq qısmen saqlanıp qaldı. Ev saibi dedi ki, eski saipleri 90 santimetrli qalın divarlar qurğanlar – olarnı teşmekniñ çaresi yoq edi.

Azbarnıñ ortasında balaban bir taş saqlanıp qalğan. Añlaşıla ki, mında yıllar devamında yata. Evniñ şimdiki saibi onı hatıra olaraq qaldırmağa istegen.

Mında alâ daa qartbabam ya da, belki, ana-babası saçqan balaban incir öse. Bir vaqıtları tuvğanlarıñ saçqan terekniñ meyvasından aşamaq, ayıp etmeñiz, amma ayrı bir duyğudır. Menim içün bu, belki de, nesillerni bağlağan kiçik canlı yiplerden biridir. İster-istemez oña daa yaqın olmaq isteysiñ.

Dedim ki: fırsatım olsa edi, men, elbet de, bu evni satın alır edim. Amma arzular imkânlarğa er vaqıt teñ kelmey. Kene de, qartbabamnıñ evini tapqanıma pek quvandım, sizge de aynısını yaşamağa tileyim.

Bunı yazar ekenim, #babaevi adlı flashmob ğayesi peyda oldı.

Dostlar, Qırımda ana-baba, qartana ve qartbabalarıñıznıñ saqlap qalğan evleri aqqında ikâye ve teessuratlarımıznı paylaşayıq. 1944 senesi sürgünlikten evel qurulğan ve bugünge qadar, qısmen saqlap qalğan olsa da, evler aqqında yazayıq. Eminim, tarif etecek ve kösterecek şeyleriñiz bar. Fotoresimler de alğışlana.

İkâyeñizni tarif etip, üç-beş dostuñızğa buyurıñız. Mence, meraqlı ve faydalı olur.

Zair Akadırov, Qırım blogeri

«Blog» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün

(Zair Akadırovnıñ Facebook saifesinden alındı)

XS
SM
MD
LG