«Terrorizmde adaletsiz şekilde qabaatlağanlar»: apiske alınğan Azamat Eyupovnıñ qorantası nasıl yaşay (video)

Azamat Eyupov Özbekistanda doğdı, yaş ekende Qırımğa köçmege arz etken edi. 25 yaşına kelgende arzusı kerçekleşti, yarımadada yerleşti. 1980-lerniñ soñunda, Qırımğa kelmezden evel, Eyupov Moskvadaki Qızıl meydanda olğan narazılıq aktsiyalarında faal iştirak etken edi. Qırımğa qaytqan soñ faal cemaat faaliyetinen oğraşmağa devam etti. 2019 senesi Eyupov «Balalarımız terrorist degil. Qırımtatarlarğa qarşı repressiyalar toqtasın» yazuvlı şiarınen Qızıl meydanğa kene çıqtı. 2021 senesi fevralniñ 17-nde onı «Hizb ut-Tahrir» teşkilâtı ile alâqaları olğanından şübheli sayıp tutqanlar. Bir aydan soñ Rusiye tahqiqatı qırımlını psihiatrik hastahanege ekspertizağa yolladı. Rusiye kontrolindeki Kiyev rayon mahkemesi Azamat Eyupovnı 2021 senesi aprelniñ 15-ne qadar apiske aldı. Eyupov terror faaliyetini teşkil etkeninde (205.5 maddesiniñ 1-inci qısmı) qabaatlana, cezası 15 yıldan 20 yılğa qadar apis ola bile. Advokatı Emil Kurbedinov, müvekkili qabaatını tanımay ve Ukraina vatandaşı olaraq IV Jeneva şartnamesi qullanılmasını talap ete, dep bildire. Vatandaş faali olğan Azamat Eyupov emin ki, oña qarşı siyasiy taqip kerçekleştirile. Apiske alınğan Eyupovnıñ ailesi nasıl yaşay – videoda baqıñız.