«Allah eyiliklerni unutmay». Azatlıqqa çıqqan Nuri Primovnıñ ilk intervyüsı (video)

Nuri Primov – Aqyardaki «Hizb ut-Tahrir davasınıñ» mabüslerinden biri – qomşu Rusiyeniñ Mariy El Cumhuriyetindeki Rusiye koloniyasından çıqtı. O ve daa eki aqyarlı – Rustem Vaitov ve Ferat Sayfullayev – 2016 senesi sentâbr ayında beş yıl umumiy rejim koloniyasında qalmalarına üküm etilgen edi. Azat etilgen soñ bergen ilk intervyüsında Nuri Primov oña qoltutqan er keske minnetdarlığını bildirip, kelecekke olğan planlarını paylaştı. «Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.