Bizim halqımız er şeyge dayanır – «fevral 26 davasınıñ» mabüsi Degermenci (video)

2015 senesi mayısnıñ 7-nde işke ketken Mustafa Degermenciniñ maşinası evden uzaq olmağan bir yerde silâlı insanlar tarafından blok etildi. Anası Aliye maşinada edi ve o sabanı yahşı hatırlay. O kün Degermenciler qorantasınıñ yaşayışını deñiştirdi. Er vaqıt yuvaş, aşıqmağan ve siyasetten uzaq olğan Mustafa «fevral 26 davasınıñ» mabüsi oldı. Mustafa ve daa bir qaç qırımtatarı 2014 senesi fevralniñ 26-nda Qırım Yuqarı Şurasınıñ binası ögünde qalabalıqlarda iştirak etkeninde qabaatlandı. Qırımnıñ Rusiye işğaline qarşı tirenüv kününiñ 5 yılında Degermenci tutulğanına ve uzun mahkeme esnasına nasıl dayanğanını tarif ete. «Halqımıznıñ destegi pek qıymetli. Birinciden, bu ilham bere, aqiqat tarafında turmağa küç bere. Amma raatlanmağa daa erte. Apishanede tek bizler yatmayıq, bunı unutmamaq kerek – uydurılğan qabaatlar boyunca anda pek çoq adam sebepsiz tutula. Er şeyden haberdar olmalı, amma eminim, halqımız er şeyge dayanır», – dep ayttı Degermenci Qırım.Aqiqatqa.