İyül 5-te musulmanlar muqaddes Ramazan ayınıñ yekünlenmesini, Oraza bayramını qayd etecek. İşğal etilgen Qırımda bu bayram raatlıq künü olacaq.
Moskva tarafından tayinlengen Qırım yolbaşçısı Sergey Aksönov iyül 5-te «Raatlıq künü aqqında» fermannı imzaladı.
2016 senesi iyün ayınıñ ortasında Qırım ve Aqyar meseleleri boyunca Ukraina Devlet hızmeti Oraza ve Qurban musulman bayramları keçirilgen künleri devlet seviyesinde raatlıq künü olaraq ilân etmek teşebbüsini bildirgen.
Ramazan (Ramadan) ayı bütün musulmanlar içün müim olğan bir aydır. Ramazan bitken soñ musulmanlar Oraza bayramını qayd ete. Bu kün olar bayram namazını qıla, eñ güzel urba kiye, milliy aşlar pişire, bayram sofralarını donata, musafirlerni qarşılay ve musafirlikke ediyelernen bara, quvana ve şenleneler.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
