Çatırdağ alt platosınıñ capındaki qış (video)

Taqvim qışınıñ yarısı endi keçti, faqat qırımlılarnıñ ekseriyeti onı daa körmedi: tüz şeer ve köylerde qar yağmadı. Qar ve qış zevqını körmek içün dağlarğa barmaq kerek – anda qar az da olsa bar. Meselâ, Mamut Sultan köy yurtuna baqqan Çatırdağnıñ şimal capında. Qar dağ derelerini qapattı, çalı ve tereklerni örtti. Küneşte qar ağlata, yel esmege başlasa, emen ve kökağaç pıtaqlarından uçıp kete. Çatırdağnıñ alt plato capında sessizlik qala. Ara-sıra ruzgâr sesi eşitile. Etrafta kimse yoq, orman yolaqlarında ise ayvan ve quş izleri körüne.