Ukraina halq deputatı Mustafa Cemilev dey ki, Qırımnıñ energetik qamaçavınıñ iştirakçileri yarımadağa elektrik energiyasınıñ berilmesini ğayrıdan başlamağa planlaştırmaylar. Bu aqta o Qırım.Aqiqatqa bildirdi.
«Şimdi muayyen planlarımız yoq. Menimce, prezident (Ukraina – QA) ile qonuşmağa kerek, imkân olsa, şimdi o er vaqıt meşğuldir», – dedi Cemilev.
O şunı da qayd etti ki, al-azırda yolaqlarnıñ birinde tamir işleri keçirilmekte. Cemilevniñ sözlerine köre, Rusiye akimiyeti içün bir işmardır: siyasiy mabüslerden bir kimseni azat etseler, elektrik ağı ğayrıdan tiklenir.
«Olar qarşımızğa adım atmalı. Fikrime köre, birinciden Ahtem Çiygoznı, belli şahıslarnı azat etmeli. Amma bir şey yapmaylar. Şunıñ içün şimdi cemaatçılıq tarafından öyle basqı, ne içün olarğa yarıq bermelimiz», – dey Cemilev.
Deputatnıñ aytqanı kibi, ukrain yolbaşçılığı Qırımğa elektrik energiyasınıñ berilmesine israr ete, çünki Kiyev ve Moskva arasında imzalanılğan añlaşmalarğa köre, Ukraina büyük para cezalarını ödemege mecbur olacaq. Amma aynı zamanda, dey Cemilev, qırımtatarlar energetik qamaçavını devam etmek kerekligini tüşüne.
Noyabr 22-ne keçer gecesi Herson vilâyetiniñ Çaplinka qasabası rayonında patlavlar yüz berdi. Qırım qamaçavı boyunca vatandaşlıq qamaçavı ştabında bildirilgeni kibi, «Qırımnı elektrika ile teminlegen elektrik bericileriniñ yolağı tüşti ve ğayrıdan tiklenemez».
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Qırım Fevqulâde işler nazirligi fevqulâde vaziyetniñ kirsetilmesi aqqında teniyeley edi. Noyabr 23 künü yarımadada raatlıq künü olaraq ilân etilgen edi.
Noyabr 24 künü «Ukrenergo» bildirgeni kibi, işçiler bozulğan tiremelerniñ birini – «Kahovka – Titan» tiremesini tamirlediler.
