Aqyarnıñ rusiyeli qanun çıqarıcı toplaşuvınıñ başı Aleksey Çalıy Qırım Rusiye içün «aqça tökülgen qara çuqur» olğanını tüşüne.
Bu aqta Aqyar qanun çıqarıcı toplaşuvınıñ saytında aşkâr etilgen intervyüde aytıla, haber ete Qırım.Aqiqat.
«Rusiye içün Qırım – içine aqça tökülgen qara çuqurdır ve şimdi bu siyasetke riayet etmek kerek. Hatırlatam, bu menim fikrim. Siz körgendirisiz: yaqında federal yekâne programmanı kene 30 mlrd rublege arttırdılar… Mında balalar yaşamay da», – dey Çalıy.
Onıñ fikrine köre, «böyle alda çoq bulunmağa çirkindir» ve ondan çıqış qıdırmağa kerek.
«Menimce, bu aqta daa iç bir muayyen plan yoqtır, bu doğru degil», – dedi o.
Evel Aqyarnıñ rusiyeli qanun çıqarıcı toplaşuvınıñ başı Aleksey Çalıy, yazğace şeerde vaziyet eyi tarafqa deñişmese, istifağa çıqmağa azır olğanını bildirgen edi. O, Aqyar valisi Sergey Menâylonı da istifağa çıqmağa çağırdı.
Aqyarda soñ vaqıtları akimiyetke qarşı mitingler sıq keçirilmege başlandı.
