Ukraina Haber siyaseti Naziriniñ Qırım meseleleri boyunca keñeşçisi Sergey Kоstinskiy Flandriya ükümetiniñ tış işler departamentiniñ başı Koen Verlekt ile körüşip, Ukrainada Rusiye tarafından işğal etilgen territoriya olaraq ilân etilgen Qırım ile memuriy sıñırdan keçüvde ecnebiy matbuat vastalarınıñ temsilcileri içün «hususiy şaraitlerniñ» teşkil etilmesi aqta bildirdi.
Bu aqta Ukraina haber siyaseti nazirliginiñ matbuat hızmeti bildire.
Kоstinskiy körüşüv devamında işğal etilgen yarımadada söz serbestligi ve insan aqları ile bağlı vaziyet ecnebiy matbuat vastalarında yeterli derecede tasvirlenmegenini qayd ete.
«Qırım söz serbestligi ile bağlı vaяiyet doğrudan anda çalışqan mustaqil jurnalistlerniñ miqdarına bağlı», – dey nazir keñeşçisi.
Ukraina Nazirler Kabineti Qırımğa kiriş ve çıqış nizamını tasdiqladı. Qaidelerge köre, Ukraina vatandaşlarına cumhuriyetke kirmek içün ukrain pasportlarını köstermek yeterlidir, çetel vatandaşları mahsus izin kâğıtını elde etmeli.
2015 senesi aprel ayında Freedom House teşkilâtı Rusiye tarafından işğal etilgen Qırım söz serbestliginiñ seviyesi eñ alçaq olğаn memleket ve territoriyalar sırasına kirgeni aqta bildirdi. Yarımada bu cedvelde Aqrusiye, İran, Turkmenistan, Özbekistan ile birliktedir.
