Link açıqlığı

Saatnıñ esas haberi

Qırımda Milliy bayraq Kününe azırlıq köreler


Qırımda iyün 26-da Milliy bayraq Kününe bağışlanğan tedbirlerni keçirmege planlaştıralar. Bunı Qırım.Aqiqat mühbirine teşkiliy komitet temsilcisi Dilâver Akiyev bildirdi.

Onıñ sözlerine köre, Bayraq Kününe bir sıra tedbirlerniñ keçirilmesi beklenile, olarnıñ arasında – foto yarışı, bala resimleri yarışı, küreş, kvest ve ilâhre. Tedbirniñ soñunda iftarnıñ keçirilmesi beklenile.

Bayram teşkilâtçıları sırasına çeşit yaşlar teşkilâtları ve teşebbüs gruppalarınıñ temsilcileri kire.

«Bu sene Bayraq Künü muqaddes Ramazan ayına kele, şunıñ içün kontsert programması da biraz farqlı olacaqtır, ilâhilerniñ icra etilmesi planlaştırıla, aqşamnı umumiy iftar ile bitirmek niyetindemiz», – dedi Akiyev.

Yaqın zamanda teşkilâtçılar şeer memuriyetine mütenasip bildirüvni berecektir.

«Tedbir siyasetke bağlı olmağanını nazarğa alıp, musaadege ümüt besleymiz», – dedi o.

Qırım.Aqiqat bildirgeni kibi, 2014 senesi Milliy bayraq Kününe tedbirler Aqmescit ve Kiyevde keçirilgen edi.

Qırımtatarlarnıñ bayrağı – üstünde altın tamğa tasvir etilgen kök tüsündeki keten bezi. Qırımtatar bayraq Künü 2009 senesi tesis etildi.

XS
SM
MD
LG