Kiyev – Ukrainanıñ qıtaiy qısmında qırımtatar halqı sürgünliginiñ 71 yıllığına bağışlanğan tedbirlerniñ keçirilmesine azırlanalar. Yarımadada matem mitingleriniñ keçirilmesi yasaq etildi, Ukraina Yuqarı Radası ise sürgünlik qurbanlarını devlet seviyesinde añmağa qarar aldı. Qıtada yalıñız soqaq aktsiyaları degil, bediiy sergiler, kontsert, mekteplerde bu mevzuda dersler keçirilecek.
44 senesi sürgünliginiñ yıllığına bağışlanğan bir sıra tedbir Ukrainada başladı. Mayıs 14-te Mustaqillik meydanında Glavpoçtamp kirişinde qırımtatar halqınıñ tarihına dair mektüp pulları taqdim etildi. Bir künden soñ İvan Gonçar Müzeyinde «Zıncır: hatıra alqaları» sergisi açıldı. «Tamğa» esnaf ve medeniyet merkezi sürgünlikten evel qırımtatar eviniñ odasını kösterdi, milliy urbalar, turmuş eşyaları ve video levhaları taqdim etildi.
İleride daa bir sıra tedbir bar. Kiyevde mayıs 17-de qırımtatarlarnıñ qoranta arhivlerinden alınğan fotoresimler taqdim etilecek «Hatıra albomı» sergisi açılacaq. Aynı o kün aqşam Meydanda ananeviy «Yüreginde ateş yaq» aktsiyası keçirilecek. Teşkilâtçılar Qırım yarımadasını ve 71 raqamını, em de «Tamğa» ve «No genocide!» yazısını çıraqlardan yapacaq olalar.
Çubarov: Bütün dünyağa bildiremiz
Mays 18-de Kiyevde eki büyük tedbir ötkerilecek – Ukraina Milliy operasında keçirilecek hatıra kontserti ve sürgünlik yıllığına bağışlanğan bütün Ukraina matem mitingi. Kontsertte qırımtatar halqınıñ liderleri, em de ukrain akimiyetiniñ vekilleri iştirak etecekler. Ukraina prezidentiniñ etrafındaki menba Qırım.Aqiqat mühbirine bildirdi ki, tedbirni Petro Poroşenko da ziyaret etmesi mümkün.
Meclisniñ Kiyev temsilciligi bütün Ukraina mitingi kütleviy olacağına ümüt ete.
«Elbet de, Qırımda olğanı kibi kütleviy olmaycaq. Amma mında, tahmin etkenimiz kibi, aman-aman 3 biñ qırımtatarı endi bar. Başqaları da qoşulacaqlar. Keçken sene o qadar çoq adam köçip kelmegen edi, amma kene de bayağı adam oldı», – dep ayttı Qırım.Aqiqatqa Ukraina prezidentiniñ qırımtatar halqı işlerinden vekâletlisi Mustafa Cemilev.
Mitingniñ esas şiarı: «Mayıs 18 künü epimiz – qırımtatarmız»
Ukraina malümat siyaseti Nazirligi miting keçirilmesine malümat ceetinden yardım ete. Nazirlik tarafından Kiyevde şeer sakinlerine aktsiyağa kelmek çağıruvları ile citylightlar qoyulğan edi. Mitingniñ esas şiarı: «Mayıs 18 künü epimiz – qırımtatarmız».
Mayıs 14-te Ukraina Yuqarı Radası «2015 senesi hatıra ve yubiley künleri aqqında» qararına sürgünlik qurbanlarını añma 2015 senesi mayıs 18 kününi devlet seviyesinde keçirmek maddesini qoştı. Qırımtatar Milliy Meclisiniñ reisi Refat Çubarov Qırım.Aqiqatqa qayd etti ki, parlamentniñ qararı Qırımnıñ işğalden azat etilmesine taba atılğan kiçik bir adım ola.
«Qırım toplulığına tam ve küçlü işaret beremiz, halqara toplulıq içün mevamımıznı qayd etemiz. Qırımda işğalci rejimni pekitmege tırışqanlarğa da işaret beremiz. Bütün bu taraflarğa baqılsa, işbu qarar müsbet ola», – dep ayttı Meclis reisi.
Ukraina tasil ve ilim Nazirligi de sürgünlik yıllığına azırlandı. Qırımdan sürgün etilgen qırımtatarlar ve diger halqlarnıñ temsilcilerini añmaq maqsadı ile mayıs 18-de yekâne dersni keçirmek tevsiyesi ile mektüp er bir mektepke yollanıldı.
«Oğrağanımız vaziyette müimi şu ki, talebelerimiz bu facianı, qırımtatar halqınıñ ağır taqdirini bilmek kerekler. Keçirilecek ders buña diqqatnı celp etmeli», – dep ayttı Qırım.Aqiqatqa umumiy orta ve mektepten aldın tasil departamentiniñ müdiri Yuriy Kononenko.
Onıñ bildirgenine köre, sürgünlik aqqında ders keçirilmesi mecburiy degil. Nazirlik mekteplerge bunıñ kibi dersni keçirmege tevsiye etip, usulşınaslıq malümatlarını yolladı. Oquv yurtlarınıñ memuriyeti ve ocaları dersni keçirmekmi-yoqmı özleri qarar alacaqlar.
Lviv, Melitopol ve Novoalekseyevkada mitingler
Meclis reisi Refat Çubarovnıñ qayd etkenine köre, matem tedbirleri yalıñız Kiyevde degil, çoq semetdeşi yaşağan Herson, Zaporojye ve Lviv vilâyetlerinde de keçirilecek.
«Vilâyet memuriyetleriniñ tafsilâtlı tedbirler planları bar, bunı resmiy akimiyet Qırımtatar Milliy Meclisi ve yerli cemiyetler ile beraber yapa», – dedi Çubarov.
Keçken seneleri Geniçesk rayonınıñ qırımtatar eyyetleri avtobuslarnen Aqmescitke bara ediler
Herson regional Meclisiniñ reisi Asan Aliyevniñ bildirgenine köre, keçken seneleri Geniçesk rayonınıñ qırımtatar eyyetleri avtobuslarnen Aqmescitke bara ediler, lâkin bu yıl böyle bir şey olmaycaq, çünki Qırımdaki mitingniñ keçirilmesi yasaq etildi.
«Bizim esas tedbirimiz – qırımtatarlarnıñ Qırım sürgünliginiñ 71 yıllığına bağışlanğan miting – qırımtatarlar toplu yaşağan yerde – Geniçesk rayonınıñ Novoalekseyevka qasabasında keçirilecek. Saat 10-da miting başlaycaq», – dedi Aliyev.
Herson vilâyetiniñ Geniçesk rayonındaki tedbirler planında – dua, akimiyet vekilleriniñ çıqışı, Herson regional Meclisi reisiniñ muracaatı, veteranlarnıñ sürgünlik hatıraları, balalarnıñ icadiy çıqışları, sergi. Medeniyet evinde «Haytarma» filmini kösterecekler, sürgünlik qurbanlarınıñ abidesine çeçekler qoyulacaq.
Zaporojye vilâyetiniñ regional Meclisi Melitopolde hatıra aktsiyasını ötkermek niyetinde. Teşkilâtçılar onıñ iştirakçileri şeer soqaqlarından yürüş ile keçip, merkeziy meydanda mitingde toplaşacaqlarını planlaştıralar.
Sürgünlik yıllığına bağışlanğan bir sıra çeşit tedbir Lvivde de ötkerilecek. Krım SOS teşebbüsiniñ koordinatorı Alim Aliyev Qırım.Aqiqatqa qayd etti ki, hatıra aktsiyalarınıñ keçirilmesi anda pek müim, çünki keçken sene devamında Qırımdan köçip kelgen bir çoq qırımtatarı Lvivde yerleşti.
Lviv demir yolu qırımtatarlarnı sürgün etkende qullanğan vagonlarğa beñzegen vagonnı açacaq
«Elimizde olğan malümatqa köre, tahminen 2 biñ qırımtatarı Lvivge köçip keldi. Mayıs 18 bizim içün büyük bir emiyet taşıy. Bu kün Stalin repressiyalarınıñ qurbanlarını añmaqnen beraber özümizge sual beremiz – halqımıznı saqlap qalmaq içün neler yapmaq kerekmiz», – dep ayttı Alim Aliyev.
Onıñ bildirgenine köre, Lvivde tedbirlerni azırlağanda medeniy aktsiyalarğa emiyet berildi.
«Lviv demir yolu qırımtatarlarnı sürgün etkende qullanğan vagonlarğa beñzegen vagonnı açacaq. Anda oyunnı sanalaştıracaqmız, adamlar sürgünlik ikâyelerini oquycaqlar, ve fotosergisi de keçirilecek. Kiçik lektsiyalar ile matem aqşamı keçirilecek, Lviv sakinleri sürgünlik yıllarınıñ yırlarını icra etecekler», – dep añaşttı Krım SOS koordinatorı.
Lvivdeki tedbirler, Kiyevde olğanı kibi, – mayıs 18 künü aqşam Svoboda meydanında matem mitingi ile bitecek.
