Qırımtatar milliy areketiniñ faali, Qırımtatar Milliy Qurultayınıñ Teftiş komissiyasınıñ sabıq azası Kurtseit Abdullayev 2015 senesi mart 9-da miting keçirilmesi qaidelerini bozğanı içün eñ uyğun ceza olaraq memuriy apis cezasını köre.
Hatırlatamız, mart 9-da Gagarin bağçasındaki ukrain şairi Taras Şevçenkonıñ 201 yıllığı munasebeti ile keçirilgen tedbirde Abdullayev «Qırım – Ukrainadır!» yazısı ile Ukraina bayrağını kötergen edi. Bu sebepten faalni memuriy mesülietke çektiler.
Cuma künü, mart 27-de, Aqmescitniñ Demir yol rayon mahkemesinde bu iş boyunca birinci toplaşuv olıp keçti. Reisi Vasiliy Zlotnikov faalniñ muracaatını qabul etip, mahkemeni mart 30-ğa belgiledi.
Abdullayev Rusiye Federatsiyası ve Qırım Anayasalarını ögrenip, mart 9-da olıp keçken aktsiyada «bir de bir bozuvlar yapmağanını» qayd etti. Abdullayev nasıl bir ceza almaq ister ediñiz sualine böyle cevap berdi: «Men tezden nefaqağa çıqacam, param yoq, devlet menden para almaq içün maña bir şey bermey daa, soqaqlarnı sepirmeycem, men 15 kün apiste oturır edim – anda bedava aşatalar».
Malüm olğanı kibi, Aqmescitte «politsiya» hadimleri Şevçenko doğğan kününe bağışlanğan mitingniñ teşkilâtçısı Leonid Kuzmin ve daa eki iştirakçini yaqaladılar. Politsiya hadimleriniñ sözlerine köre, sebep – mitingde ukrain timsalleriniñ olması. Mahkeme üç faalni mecburiy işler ile cezaladı. Faaller mahkeme qararına şikâyet ettiler.
