Qırımtatar Milliy Meclis reisiniñ birinci muavini Nariman Celâlnıñ Aqmescit rayonında Biy Tanış (Pervomayskoye) köyündeki evinde keçirilgen tintüv «Qırımnıñ Rusiye ükümeti tarafından qorqutmaq içün yapılğan daa bir aktsiyasıdır», – dep ayttı Qırımtatar milliy areketiniñ faali Zair Smedlâyev Qırım.Aqiqatnıñ mühbirine.
«Mence, bu onıñ yañı vazifesi ile bağlı, daa bir qorqutuv aktsiyası, qırımtatar temsil organında bile, Aksönov ile añlaşmayıp berilgen vazifelerge kimse kelmesin dep», – dep ayttı Zair Smedlâyev.
Bundan ğayrı, o, tintüv qaidelerge köre keçirilgenini qayd etti. Nariman Celâlnıñ qomşuları şaatlar olaraq davet etildi. Uquq qoruyıcılar tintüvge başlamazdan evel Aqmescitniñ Kiyev rayon mahkemesiniñ qararını seslendirdiler.
Qırım.Aqiqat saytı bildirgeni kibi, Qırımtatar Milliy Meclis reisiniñ birinci muavini Nariman Celâlnıñ Aqmescit rayonınıñ Biy Tanış köyündeki evinde tintüv keçirildi. Tintüv tahminen bir saat sürdi.
Şaatlarnıñ aytqanına köre, taqiqatçılar Celâlnıñ evinden bir şey almadılar. Meclis reisiniñ birinci muavini taqiqat tedbirleri aqqında jurnalistlerge tarif etip olamaycağını bildirdi, çünki onıñ malümatnı tarqatmamaq sözü bar.
Cuma künü, mart 27-de, Qırımtatar Milliy Meclis reisiniñ birinci muavini Nariman Celâlnı «fevral 26 işi» boyunca sorğuğa çağırdılar. Sorğu beş saat devam etti. Soñra Celâl uquq qoruyıcılarnen beraber evge tintüv keçirilmesi içün yol aldı.
Mart 23 künü Taqiqat komitetinde Qırımtatar Milliy Meclis reisiniñ muavini İlmi Ümerov sorğuğa çekilgen edi. Onı Ahtem Çiygoznıñ faaliyeti ve 2014 senesi fevral 26 künü mitingniñ teşkilâtçıları aqqında sorağan ediler.
2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.
