Qırımtatar Milliy Meclis reisi muavininiñ evinde 9 saat sürgen tintüv yekünlendi. Bunı vaqia yerinde bulunğan Qırım.Aqiqat mühbiri bildire.
Al-azırda evde Çiygoznıñ dost, qomşu ve tuvğanları buluna. Tintüvden soñ ev darma-dağın etildi: eşya, mefruşat avdarıldı, taban açıldı, merdivenler qırdırıldı.
Çiygoznıñ apayı Elmira Ablâlimova tintüv vaqtında evde bir özü edi, aqrabasından başqa bir kimseni içeri almadılar. Onıñ aytqanına köre, tintüv neticesinde av patronından ğayrı bir şey tapmadılar.
Ablâlimovanıñ bildirgenine köre, qorantanıñ şahsiy parası olğan 2 biñ dollar ve 100 euro, bundan ğayrı, Tataristan ziyaretinde ediye etilgen hatıralıq para, bilgisayar tehnikası ve şahsiy telefonlar alındı.
Ablâlimovanıñ aytqanına köre, tintüv vaqtında Rusiye arbiyleriniñ oña aytmağan lafları qalmadı.
Uquq qoruyıcılarnıñ izaatları alâ daa yoq.
Yanvar 30-da sabadan berli Çiygoznıñ Bağçasaraydaki evinde tintüv keçirildi. OMON hadimleri ev etrafını sarıp aldılar. İçeride Çiygoznıñ apayından ğayrı başqa bir kimse yoq edi.
Taqiqat tedbirleri Rusiye Federatsiyası Cinaiy kodeksiniñ 212-nci maddesi 1-inci qısmı boyunca cinaiy iş («kütleviy numayışlarnıñ teşkil etilmesi») çerçivesinde keçirildi.
Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildirdi ki, Çiygoznı «kütleviy numayışnı teşkil etüv ve iştirak etüvde» şekleyler.
