İşğal etilgen Qırımda arbiy biletlerni aluv müddeti aprel ayınıñ başına qadar arttırıldı. Bunı Qırım «Nazirler şurası» reisiniñ birinci muavini Mihail Şeremet dekabr 22-de Qırım arbiy komissarlıqlarını ziyaret etkende bildirdi, – dep haber ete Qırım ükümetiniñ matbuat hızmeti.
Berilgen malümatqa köre, Mihail Şeremet arbiy biletni vaqtında almağan adamlar para cezasını alacaqlar degen malümatnı resmiy şekilde red etti.
«Yarından itibaren Qırım Cumhuriyetiniñ MÇS hadimleri arbiy komissarlıqlarda nevbetler meselesini al etmek içün çadırlarnı quracaqlar», – dedi Şeremet.
Malüm ki, işğal etilgen Qırımnıñ arbiy komissarlıqları «soñki ziyaretçige qadar» çalışalar.
Bunıñ sebebi dekabr 20-ne qadar arbiy cedvelge adnı yazdırmağanlar para cezasını alacaqlar degen haber oldı.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
