İşğal etilgen Qırımda Ukraina Baş prokuraturasınıñ hadimi esir alındı. Onı Rusiye FSB hadimleri terroristik akt azırlanmasında qabaatladılar.
Bunı UBP matbuat hızmeti bildire.
«Bu sene dekabr 5-te vaqtınca işğal etilgen Qırım yarımadasında belgisiz insanlar «Aqmescit-Kiyev» treninden Bağçasaray şeerinde anasını ziyaret etken Ukraina Baş prokuraturası bölüginiñ yolbaşçı muavinini çıqarıp, belli olmağan bir yerge alıp kettiler», – aytıla beyanatta.
UBP malümatına köre, belli bir müddet devamında Baş prokuratura hadiminiñ bulunğan yeri belli degil edi. Dekabr 15-te ise Baş prokuratura onıñ 10 kün devamında Saq politsiya bölüginiñ taqiqat izolâtorında bulunması aqqında haber aldı.
«Onı memuriy qaide bozuvında qabaatlap, protokol tizdiler. Aynı vaqıtta Ukraina prokuraturasınıñ hadimine ruhiy basqı yapıldı, onı qorquzdılar ve oña qarşı küç qullandılar», – dep bildire UBP.
Böylece, berilgen malümatqa köre, FSB hadimleri Ukraina Baş prokuraturasınıñ hadimini sorğuğa çekip, poligrafnı qullandılar. Olar onı 2014 senesi avgust soñunda, «cumhuriyet prokuraturası» hadiminiñ maşinasında bomba tapılğanda, terroristik akt azırlanmasında qabaatlap, oña casus dediler.
10 künlik apis cezasından soñ erkekni azat ettiler.
«İşğal etilgen Qırım yarımadası, em de Ukrainanıñ şarqiy vilâyetlerinde yüz bergen bunıñ kibi adise-vaqialardan sebep Ukraina Baş prokurorı Vitaliy Yarema içki havfsızlıq idaresi ve prokuratura hadimleriniñ imayesine prokuratura organlarınıñ hadimlerini olarnıñ işine qanunsız qarışuv, em de olarnı ve olarnıñ qoranta azalarını telükeden qorumaq içün zarur olğan bütün tedbirler yapılmasını avale etti», – dep bildire prokuraturanıñ matbuat hızmeti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
