Ukraina Nazirler şurası kâtibiyetiniñ Qırım ve Aqyar işleri boyunca departament beş insandan ibarettir. İşbu departament yarımadanı qaytaruv işinen oğraşmaqta.
Bunı departament yolbaşçısı Aslan Ömer Qırımlı «Tsentr jurnalistskih rassledovaniy» agentliginiñ informatsion muracaatına cevap olaraq bildirdi.
Malüm ki, işbu departament iyün ayınıñ ortasında meydanğa ketirilgen edi. Qırımlınıñ bildirgenine köre, departamentniñ esas maqsadı Qırımnı işğalden azat etmek, yarımadanı Ukrainağa keri qaytarmaq, Qırımda Ukraina vatandaşları ve köçip kelgenlerniñ aq-uquqları ve serbestligini qorumaq oladır.
«Departament hadimleri, şu cümleden reberligi, umumen beş insandan ibarettir. Devletimiz oğrağan vaziyette epimiz gayet semereli ve bütün vazifelerini tolusınen ve zamanında eda etmek kerekmiz», – dep qayd etti o.
Berilgen malümatqa köre, departamentniñ vekâleti ve vazifeleri pek sıñırlanğan ve yalıñız malümatnı toplamaqnen bağlı.
Hatırlatamız, Nazirler şurası yanındaki Qırım ve Aqyar işleri boyunca departament icra akimiyetniñ Qırımnı işğalden azat etüv meselelerinen oğraşqan yekâne organı sayıla.
Ukrainada Qırım meselelerinen ve andan mecburen köçip kelgen insanlarnıñ problemlerinen oğraşacaq akimiyetniñ merkeziy organı alâ daa yoq.
Ukraina prezidenti memuriyeti yanındaki işğal etilgen territoriya ve içtimaiy alışuv boyunca bölük aman-aman yoq etildi – onıñ erkânında yalıñız reber Andrey İvanets ve adliyeci bar.
Avgust 5-te Nazirler şurası Qırım Muhtar Cumhuriyeti, Aqyar şeeri ve vaqtınca yaşağan yerini deñiştirgen şahıslarnıñ meseleleri boyunca Devlet hızmetini meydanğa ketirdi. Lâkin o alâ daa çalışmay, çünki onıñ reberi tayinlenmedi. Bunıñnen bağlı yarış neticesiz oldı.
