Noyabr 15 künü Gürcistannıñ Tbilisi şeerinde Rusiye tarafından Abhaziyanıñ işğaline qarşı mitingde muhalif küçler qırımtatar ve ukrain bayraqlarını köterdiler.
Mitingni devletniñ «Yekâne milliy areketi» muhalif firqası azırladı.
«Rusiye Abhaziya ile daa sıq munasebetler aqqında añlaşma tizgeni bizim içün bir sebep oldı», – dep ayttı Gürcistannıñ milliy havfsızlıq Şurasınıñ sabıq kâtibi Georgiy Bоkeriya.
İştirakçilerniñ bazıları Rusiye prezidenti Vladimir Putinniñ süreti ve «Rusiyeni toqtatırmız» yazısı ile şiarlarnen keldiler.
Hatırlatamız, Rusiyeniñ istilâcı siyasetine qarşı Gürcistan ve Ukrainanıñ Kiyev şeerinde Mihaylov meydanında narazılıq numayışları teşkil etildi. Tedbirde ukrainliler ve gürciler iştirak ettiler.
Fevralniñ soñunda martnıñ başında, 2014 senesi Rusiyeden ve Qırımdaki Qara deñiz flotundan arbiyler Qırım yarımadasını işğal ettiler. Mart 16 künü 2014 senesi Qırım ve Aqyarnıñ statusı boyunca referendum ötkerildi. Onıñ neticelerine esaslanıp, Rusiye Qırımnı öz terkibine qoştı. Ukraina, Avropa birligi, AQŞ bu rey berüvni tanımadılr ve Qırım Rusiye tarafından işğal etildi dep sayalar.
