Link açıqlığı

Saatnıñ esas haberi

Tair Smedlâyevge eki aylıq apis cezasını belgilediler, mahkeme toplaşuvına aqrabalarını kirsetmediler


Aqmescit şeeriniñ Kiyev rayon mahkemesi qırımtatar milliy Qurultayınıñ Merkeziy saylav komissiyasınıñ başı Zair Smedlâyevniñ ağası Tair Smedlâyevge cezanı belgiledi.

Qırım.Aqiqat saytınıñ mühbiri aytqanı kibi, mahkeme Tair Smedlâyevni eki ayğa apiske almağa qararnı çıqardı – 2014 senesi dekabr 22-ne qadar.

Onıñ adliyecisi Emil Kürbedinov aytqanı kibi, bu qarar temelsiz ve sebepsizdir.

Mahkeme toplaşuvı qapalı sürette keçti, jurnalist ve aqrabalarnı kirsetmediler. Bunı iş şaatlarına «telüke olacağı» ile añlattılar.

«Mahkeme toplaşuvı 1937 senesi olğanı kibi keçti: ne tuvğanlarnı, ne yaqınlarnı kirsetmediler», – dep izaatladı mahkeme ketişatını Zair Smedlâyev.

Emil Kürbedinov mahkemeniñ bu qararına itiraz bildirilecegi aqqında bildirdi.

Tair Smedlâyev Aqmescit şeeriniñ SİZOsına avuştırıldı,– haber ete Qırım.Aqiqat mühbiri.

Çarşenbe künü, oktâbr 22-de, Eski Qırımda politsiya hadimleri Qurultaynıñ Merkeziy saylav komissiya reisi, qırımtatar faaliyetçi Zair Smedlâyevniñ qardaşını Tair Smedlâyevni yaqaladılar. Maşinasını politsiya hadimleri taqip ete edi, oña toqtatmağa emir ettiler, soñra ise blok etip, özlerini tanıttılar. Soñra onı Aqmescitte Franko caddesinde vaqtınca bulunuv izolâtorına ketirdiler

Zair Smedlâyevniñ fikrine köre, bunı yapmaq içün iç bir acet yoq edi, çünki Tair Smedlâyev taqiqattan saqlanmay edi. O, Rusiye Federatsiyasınıñ diger mahkeme instantsiyalarına muracaat etecegini bildirdi.

XS
SM
MD
LG