Qırımtatarlarnıñ milliy lideri Mustafa Cemilev yarımada akimiyetine yaqın olğan «Qırım» teşkilâtına inanmay. O, Qırımda Leonid Graç spiker olğan vaqıtta bu kibi teşkilâtlarnıñ taqdirini hatırlata.
Bunı o Qırım.Aqiqat saytına bildirdi.
«Tafsilâtlarnı bilmeyim, amma Çakallarnıñ Şurası olğanı kibidir dep tüşünem, «Qırım birligi» ve ilâhre. Biraz vaqıt keçse, bu areket de çöplük obasında olacaqtır. Şunıñ içün oña emiyet bermege kerekmey. Halqım siyasiy noqtaiy-nazarlan ğayet pişkindir, bularnı endi kördik», – dedi Cemilev.
Mecliste ise bu kibi areketleniñ maqsadı milliy idare organları olğan Meclis ve Qurultay kibi bir teşkilâtnı meydanğa ketirmekten ibarettir dep tüşüneler.
«Şahsen menim «Qırım» cemaat areketiniñ olması ile bağlı qasevetim şimdi yoq. Olarnıñ areketlerine er şey bağlıdır. Akimiyet ile saf işbirlik aqqında aytacaq bir tşekilât da ola bilir»,– dep tarif etti Qırım.Aqiqatqa qırımtatar milliy Meclisiniñ reis muavini nariman Celâl.
«Qırım» serlevalı qırımtatar halqınıñ cemaat areketiniñ teşkil etilmesi aqqında Qırımnıñ «baş nazir» muavini Remzi İlyasov haber etken edi. Onıñ aytqanı kibi, areket bu seneniñ soñuna qadar meydanğa kelecek eken. Bundan soñ ise Rusiyeniñ daa sekiz regionında öz faaliyetini tarqatacaq eken.
